«7 арна» жаңа маусымда еліміздің медиа-нарығында бұрын-соңды болмаған ең қызықты жобаның тұсауын кескелі отыр. «Қыздар-ай» – құрбылар бас қосып сырласатын, жүрек сырын ақтаратын, ешкімге айтпаған құпиясын бөлісетін, көзіне жас алып мұңаятын, қуанып шаттанатын, қоғамда резонанс тудырған тақырыпты талқылайтын күндізгі шоу.
«Көктемгі маусымды аруларымызға арналған әлеуметтік-танымдық бағыттағы әдемі бағдарламамен бастауымыз бекер емес. Өйткені арнамыздың негізгі көрермені – әйел азаматшалар. Біздің қазіргі қоғамымызда әйелдің атқаратын миссиясы да жауапты, арқалаған жүгі де ауыр. Жалпы әйелдер мәселесі – тарихи жағынан алғанда да, бүгінгі шынайы уақыт шеңберінен алғанда да бұқаралық санаға әсер ететін, қоғам дамуына да ықпал ететін күш. Сондықтан қыз-келіншектерімізге эфир төрінен орын беріп, күндізгі шоу арқылы отбасы құндылығы, бала тәрбиесі, тұлғалық дамуы, қоғамдағы рөлі секілді өзекті мәселерді талқылауға арналған танымдық орта қалыптастыруды жөн санадық»,- дейді телеарнаның Бас директоры Әния Байоразова.
Жаңа форматтағы әлеуметтік-танымдық бағдарлама үш бөлімнен тұрады: алғашқы бөлімде ханымдар үстел басында қоғамда резонанс тудырған, өте өзекті, тіпті ауыр тақырыптарды ашық талқылап, себеп-салдарын анықтауға тырысады. Екінші бөлімде бас кейіпкермен әңгіме «Сырласу бөлмесінде» жалғасады. Жүрек түкпіріндегі жан сырын ақтарып, бір жеңілдеп алған кейіпкерімізді үшінші бөлімде тосын сый, кейде қызықты сынақтар күтіп тұрады.
«Бағдарламаға сол күні қозғалатын тақырыпқа байланысты білікті мамандар сарапшы ретінде қонаққа шақырылады. Ал бағдарламаның кейіпкерлері үй шаруасындағы әйелдерден бастап, медиа тұлғалар, әншілер, актрисалар, блогерлер болады. Реалити элементтері бар шоу бағдарламаның тізгіні тәжірибелі тележүргізушілер Жанар Айжанова мен Аша Матайға тапсырылған», – дейді жоба продюсері Ғалия Байбосынова.
Алғашқы саны 20 наурызда эфирге шығатын бағдарлама «7 aрна» эфирінен дүйсенбі мен жұма аралығында күнбе-күн сағат 14:30-да көрсетіледі.
© 2009-, «Жетінші арна». Барлық құқықтар қорғалған.
