«7 арна» эфирінен көрерменге жол тартқалы отырған тағы бір ерекше жоба – «Battle сөз» бағдарламасы. Бұл тележобада Жандарбек Бұлғақов, Мұхтар Ниязов, Бекарыс Шойбеков, Әлібек Серғалиев, Мейіржан Әлібек сынды елімізге танымал айтыскерлер бас қосып, әр аптаның айтулы оқиғалары мен қоғамда кеңінен талқыланып жатқан алуан мәселеге қатысты сұхбат құрып, пікір таластырады. Ең қызығы – қызыл тілді қару еткен саңлақтар бір-бірінің сөзін ұйқастыра отырып, қара өлеңмен жалғайды.
«Жаңа форматтағы тележобаның көздегені – әзілмен әдіптеліп, қалжыңмен көмкерілген сүбелі сұхбаттар арқылы қоғамдағы қордаланған мәселелерді мақтамен бауыздағандай етіп жеткізу. Талабы мен талғамы биік көрерменге ой салу», – дейді телеарнаның бас директоры Әния Байоразова.
Отандық медианарықта бұрын-соңды болмаған «Battle сөз» жобасының авторы – «Өнер барысы», «Dala battle» жобалары арқылы танылған продюсер әрі айтыскер ақын Мейіржан Әлібек. Подкаст форматында өтетін тележобаға әр апта сайын айтыскерлерден бөлек жұлдызды қонақтар да келеді. Қысқасы, «7 арна» көрерменін көптеген тосын сый күтіп тұр.
«Айтыскерлердің сахна сыртында бір-біріне ұйқаспен жауап беретін кездері жиі болып тұрады. Қалжыңмен айтылған сондай ұйқастар кейін ел арасына кеңінен тарап кетіп жатады. Бұл халықтың шешендік өнерге қызығушылығы жоғары екенін көрсетсе керек, сондықтан осындай телевизиялық жоба түсіру туралы идея келді», – дейді жоба продюсері Мейіржан Әлібек.
Айтыс тарландарының басын қосқан жаңа жобаны көрермен «7 арна» эфирінен әр сенбіде сағат 15.30-де тамашалай алады. Бағдарламаның тұсаукесер саны 1 сәуір күні эфирге шығады.
Тележобада айтыскерлер мен жұлдызды қонақтар бас қосып, әр аптаның айтулы оқиғалары мен қоғамда кеңінен талқыланып жатқан алуан мәселеге қатысты сұхбат құрып, пікір таластырады.
Толығырақ© 2009-, «Жетінші арна». Барлық құқықтар қорғалған.
