«Жетінші арна» 8 сәуір күні «Сен BOSSың» комедиялық сериалын ұсынады. Бұл – «Сен BOSSың» толықметражды фильмнің сериал нұсқасы. Аталған туынды 2023 жылы жарыққа шығып, бірден Кинопоисктегі отандық өндірістің ТОП-10 фильмінің қатарына енді.
Бас кейіпкер – бүкіл өмірін мансапқа арнаған Раушан Қанатқызы. Ол 20 жыл бойы ірі фармацевтикалық компанияда топ-менеджер болып жұмыс істеп, енді қызмет бабымен жоғарылауын күтіп жүр. Ал ұлы Олжас бір ай бұрын танысып, ғашық болып қалған сүйіктісі Қарлығашқа үйленбек. Қарлығаш – шетелде білім алып, тәжірибе жинаған ақылына көркі сай қыз.
Ол күтпеген жерден енесі Раушан жұмыс істейтін компанияның директоры болып тағайындалады. Бұл орынға Раушан бұрыннан көз тігіп жүрген. Осылайша, екі әйелдің арасындағы бітіспес дау басталады. Олжас екі оттың ортасында қалады. Жұмыста Қарлығаштың билігі жүрсе, үйде Раушан «қатал енеге» айналып, өз дегенін жасатады.
«Телехикая көрерменді өзекті тақырыбымен қызықтыра түседі деп ойлаймын. Бұл туындыға «бітпейтін жыр» – ене мен келін арақатынасы арқау болған. Әр серияда кейіпкерлердің отбасы мен мансапты теңдей ұстауға тырысып, тәуекелге барғанын көреміз. Телехикая жанры бойынша комедия болғанымен, драмалық сарыны бар. Көрермен отбасындағы тәрбиенің түрлі моделін көріп, бақыттың кілті жұмыста жемісті болу ма әлде шаңырақты шаттыққа бөлеу ме деген сынды мәселелерге ой жүгіртеді», – дейді «Жетінші арнаның» Бас директоры Әния Байоразова.
«Сен BOSSың» туындысының телевизиялық нұсқасы «Жетінші арнаға» арнайы түсірілген. Маған продюсер Асқар Бисембиннің, сценаристер Мейірман Нұрлыбек пен Ильгинар Абдуллаевтың идеясы ұнады. Яғни келіннің жұмыста енесіне бастық болуы, ал үйде енесінің өз есесін қайтаруы. Біз түсірілім үшін Қазақстандағы үздік режиссерлардың бірі Ален Ниязбековты шақырдық. Сериалда фильмде жоқ қосымша кейіпкерлер мен оқиға желілері бар», – дейді бас продюсер Сәбит Рақымбаев.
«Сен BOSSың» сериалын 8 сәуірден бастап «Жетінші арнадан» көріңіздер.
Бас кейіпкер – бүкіл өмірін мансапқа арнаған Раушан Қанатқызы. Ол 20 жыл бойы ірі фармацевтикалық компанияда топ-менеджер болып жұмыс істеп, енді қызмет бабымен жоғарылауын күтіп жүр.
Толығырақ© 2009-, «Жетінші арна». Барлық құқықтар қорғалған.
