Қытай қазақтарының тұрмыс-тіршілігі жайлы «Менің Алтайым» дорамасы қазақстандық көрерменге ұсынылады. Жаңа телехикаяны «Жетінші арна» көрсетеді. Телехикая 8 бөлімнен тұрады. Басты рөлді Қытайдың танымал актері Юй Ши ойнайды. Ол бұл телехикаяға түсу үшін арнайы қазақ тілі сабақтарына қатысып, сериалда Батай есімді қазақ жігітінің рөлін сомдаған. Бұдан бөлек телехикаяға Шыңжаңда тұратын қандастар да түскен.
«Менің Алтайым» телехикаясының оқиға желісі Алтайда шағын дүкен ашқан Хань қызы Ли Вэньсю мен оның отбасының жергілікті қазақтармен байланысы аясында өрбиді. Онда Алтай аймағында тұратын қандастарымыздың бай және қайталанбас мәдениеті, тұрмыс-тіршілігі көрініс тапқан. iQIYI онлайн платформасы түсірген «Менің Алтайым» сериалының әлемдік тұсаукесері Канн телефестивалі аясында өтіп, сарапшылардың жоғары бағасын алды.
«Сериал жақын күндері «Жетінші арна» эфирінен ұсынылады. Бұл туралы бүгін телеарна басшылығы және Қытай мемлекеттік телевидение, радио әкімшілігі мен iQIYI компаниясы өкілдерімен болған кездесуде келісім жасалды», – деп хабарлайды «Жетінші арнаның» баспасөз қызметі.
© 2009-, «Жетінші арна». Барлық құқықтар қорғалған.
