Ақордада Астанаға ресми сапармен келген Италия Министрлер Кеңесінің Төрағасы Джорджа Мелониді салтанатты түрде қарсы алу рәсімі өтті. Екі елдің мемлекеттік әнұрандары шырқалып, мәртебелі мейманға құрмет көрсетілді. Қасым-Жомарт Тоқаев Қазақстанға ресми сапармен келген Джорджа Мелонимен кеңейтілген құрамда келіссөз жүргізді.
«Сіздің бұл сапарыңыз – екіжақты ынтымақтастығымыздағы айтулы оқиға. Біз өзара байланысқа, достық пен сенімге құрылған қарым-қатынасқа айрықша мән береміз. Италия Қазақстанның әлемдегі сауда серіктестерінің үштігіне кіреді және Еуропадағы ірі әріптесіміз», — деді Мемлекет басшысы.
Елдер арасындағы тауар айналымы 24 пайызға артып, өткен жылы 20 миллиард долларға жеткен.Сондай-ақ Қазақстанда ірі инвесторлар бастаған 270-ке жуық италиялық компания табысты жұмыс істеп жатыр екен. Джорджа Мелони екі ел арасындағы ықпалдастықты жоғары бағалап, оның стратегиялық серіктестік рухына сай келетінін айтты.
———————————————
© 2009-, «Жетінші арна». Барлық құқықтар қорғалған.
