«Ғашығым» фильмі кіршіксіз сезімнен сыр шертеді

Шынайы махаббат бар ма? Әлде ол тек өткеннің елесі ме? Жаңа қырғыз фильмі «Ғашығым» осы сауалға жауап іздейді. Режиссер Манас Халдаров 90-жылдардың атмосферасын қайта тірілтіп, көрерменді сол кездегі романтиканың, кіршіксіз сезімнің иіріміне жетелейді. Кино қарапайым махаббат хикаясынан әлдеқайда терең: онда сезім, күрес, арман және тағдыр бар.
Мақсат Айсұлуға бір көргеннен ессіз ғашық болады. Бірақ сүйген қызы – біреудің қалыңдығы. Ата-ана таңдауы да Мақсат емес, достарының ұлы Тілекте. Соған қарамастан, жас жігіт берілуден бас тартып, ата-ана назарын өзіне аудартуға бел буады. Актер жалдайды. Түрлі әрекетке барады. Бірақ іс насырға шабады.

МАНАС ХАЛДАРОВ, ФИЛЬМ РЕЖИССЕРІ:
— Сол кездегі романтиканы көрсеткім келді. Ең алдымен, шынайы махаббатты жеткізгім келді, әрі шынайы махаббат әлі да бар ма, әлде жоқ па деген сұраққа жауап іздеді. Осы фильмге қарап, әр адам осы сұрақты өзіне қайта қоя алады.

Фильм сюжеті шым-шытырыққа толы, мелодрама жанрында. Көрерменге романтика сыйлай отырып, ойландыратын ұрымтал тұстары көп.

МАНАС ХАЛДАРОВ, ФИЛЬМ РЕЖИССЕРІ:
— Біз бұрынғыдай ретро фильмдерді, әсіресе жетпісінші, сексенінші немесе тоқсаныншы жылдарды баяндайтын фильмдерді көптен бері көрмедік. Әсіресе қырғыз киносы жағынан. Бұл фильм сол кезеңді шынайы жеткізе алған сирек туындылардың бірі болды деуге болады. Көптеген көрермен фильмнің сол заманның атмосферасын керемет жеткізгенін айтты — визуалды түрде, костюмдер арқылы, диалогтар арқылы. Бұл, әрине, қуантады.

Актерлік құрамға кіл мықтылар таңдалып алынған. «Қос ғашықтың рөліндегі әртістер 90-жылдардағы шынайы өмірді сомдап бере алды», — дейді шығармашылық топ.

МАНАС ХАЛДАРОВ, ФИЛЬМ РЕЖИССЕРІ:
— Біз сол 90-жылдарға сай келетін типаждарды іздедік. Қазіргі актерлер мен актрисалардың көбі тым заманауи көрінеді, сондықтан актердің харизмасы мен сырт келбеті ескі дәуірдің адамындай болуы өте маңызды екенін түсіндік. Содан кейін бүкіл Қазақстан бойынша іздей бастадық. Төрт жүзге жуық өтінім келіп түсті, Басты рөлді сомдаған актерді біз Талас театрынан таптық. Жас жігіт. Бұл – оның толықметражды фильмдегі дебюті. Ал Айсұлу рөлін сомдайтын қызды да бірнеше нұсқамен байқап көрдік.

Жалпы, «Ғашығым» фильмі қазақстандық көрермен тарапынан жылы қабылданғаны өте қуантады, дейді туынды авторы. Айта кетейік, романтикалық мелодраманы еліміздегі кинотеатрлардан әлі де тамашалай алады.
———————————————