Жанары сөнсе де, көкірек көзі ояу. Жамбылдық зағип жан Ербол Бегімов жалғыз өзі 2 мыңға жуық кітапты Брайль жүйесіне көшірген. Оның сыртында көзі нашар көретіндерге компютер үйретіп, ұялы телефонды қолданудың тәсілін түсіндіреді.
Ербол Бегімов 30 жасында жарық дүниені көруден қалған. Бірақ ешқашан жігері жасыған емес. Тағдырдың сынына мойымаған азамат Брайль қарпін меңгеріп, талай оқулықты нүктелі-бедерлі нұсқада басып шығарды. Ал бұл туындылар жанарынан айрылған талай жанның қолына жетті.
ЕРБОЛ БЕГІМОВ, КІТАПХАНАШЫ:
— Бір нүктелі — бедерлі қарпіндегі кітап 150-160 беттен тұрады. Біз жалпақ баспалы қарпіндегі мәтінді алып келіп, «Duxbury Braille» деген арнайы бағдарламаға енгізіп, CTRL+E пернелер комбинациясының мәзірін енгіземіз. Бұл А4 формат. Бір кітап бетінде 26 жол болуы керек.
Кейіпкеріміз – 2 мыңға жуық оқулықты Брайль қарпіне аударған Жамбылдағы жалғыз жан. Сондай-ақ ол өңірдегі арнаулы кітапханада брайлист және компьютер үйімесін ашып, 50-ге жуық азаматқа ақпараттық -технологияның қыр-сырын үйретті. Тағы 40 оқырман саусақ ұшымен сипап оқуға машықтанды. Сондай шәкірттерінің бірі – меркілік Мария Нисонова.
МАРИЯ НИСОНОВА, КІТАПХАНАШЫ:
— Менің қазір алға қойған басты мақсатым – Брайль принтерін толыққанды меңгеру. Артынша нүктелі- бедерлі қарпінде кітап басып шығарсам деген үлкен арманым бар. Ұстазым жақсы. Бәрін үйретеді. Курсты аяқтаған соң Меркі ауданынан шағын баспахана ашуды жоспарлап отырмын.
Ербол Бегімов – көзі көрмесе де көңілі жарық жан. Ол басып шығарған нүктелі-бедерлі туындылары қолмен сипау арқылы талай азамат шығарманың тереңіне бойлап, рухани азық алды. Жалпы, Жамбылдағы зағип және көзі нашар көретін кітапханада кез келген туындыны бес түрлі негізде оқуға мүмкіндік бар. Ол үшін мұнда 10-нан астам инклюзивті жоба жүзеге асып жатыр.
———————————————
© 2009-, «Жетінші арна». Барлық құқықтар қорғалған.
