Жезқазған маңындағы «Жомарт» кенішінде қайтыс болған кеншілердің отбасы мемлекеттен және «Қазақмыс» корпорациясынан тиесілі жәрдемақыны түгел алуы тиіс. Оқиға орнында жүрген Премьер-министрдің орынбасары жауапты органдарға осыны тапсырды. Шахтада болған жағдайды мұқият тексеруді Үкіметке Президент міндеттеді. Қасым-Жомарт Тоқаев қаза болған жұмысшылардың туған-туыстары мен жақындарына көңіл айту жеделхатын жолдады.
«Жомарт» кенішінде қайтыс болған жеті азаматтың аты-жөні белгілі. Олар: Қайрат Ақшалов, Ардақ Жақыбаев, Бақытбек Жұмадуллаев, Орынбек Кенжебеков, Ғалымжан Молдабеков, Олжас Нұрылдаев және Константин Рожков. Үлкені — 49, кішісі — 26 жаста. Бәрінің де балалары бар.
«Қазақмыс» корпорациясы таратқан ақпарат бойынша шахтада кеше кешке кенішке тән емес табиғи газ жарылған. Салдарынан тау жынысы опырылып, жеті кенші үйіндінің арғы жағында қалған. Алтауының мәйітін құтқарушылар түнде, тағы біреуін таңға жақын жер бетіне шығарды.
БЕКСҰЛТАН-ӘЛИ РАҚЫМБАЕВ, ТЖМ БАС МАМАНЫ:
– Ұлытау және Қарағанды облыстары төтенше жағдайлар күштері мен құралдары оқиға орнында. Кеніштегі төтенше жағдайлар салдарын жоюға көмек көрсету үшін қосымша АСС-серіктес ЖШС құтқарушылар тобы жіберілді.
Осы қайғылы оқиға бойынша қылмыстық іс қозғалып, тергеу басталды.
ЕРБОЛ ҚАЙЫРБЕКОВ, ПОЛИЦИЯ ДЕПАРТАМЕНТІ БАСТЫҒЫНЫҢ М.А:
— Аталған факт бойынша ҚР Қылмыстық кодексінің 277-бабы 3-бөлігі «Тау-кен немесе құрылыс жұмыстарын жүргізу кезінде қауіпсіздік ережелерін бұзу» бойынша іс қозғалды.
Оқиға орнында қазір вице-премьер Қанат Бозымбаев бастаған үкіметтік комиссия жұмыс істеп жатыр. Мамандар тергеу барысымен танысып, қаза тапқандардың туыстарымен кездесті. Премьер-министрдің орынбасары ешбір отбасы назарсыз қалмасын деді.
ҚАНАТ БОЗЫМБАЕВ, ПРЕМЬЕР-МИНИСТРДІҢ ОРЫНБАСАРЫ:
— Біздің қазіргі міндетіміз – Мемлекет басшысы тапсырғандай, апаттың мән-жайын мұқият тексеру. Құқық қорғау органдарының сараптамасын және еңбек инспекторларымен бірге өндірістік қауіпсіздікке қатысты тергеу жұмысын жүргізіп, қажетті шешімдер қабылдауымыз керек.
АҚМӘДИ САРБАСОВ, ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ БІРІНШІ ВИЦЕ-МИНИСТРІ:
— Қайтыс болған азаматтардың отбасына бірнеше өтемақы тиесілі. Біріншісі, республикалық бюджеттен асыраушысынан айырылғандарға берілетін әлеуметтік жәрдемақы. Екіншісі, мемлекеттік әлеуметтік сақтандыру қорынан төленетін ақы. Үшіншісі, өмірді сақтандырушы компанияның төлемақысы. Және жерлеу рәсіміне берілетін жәрдемақы. Төрт баласы бар отбасы айына 1 млн теңге алатын болады. Бұл жұмыс беруші төлейтін өтемақыдан бөлек.
Қара жамылған әр отбасыға өңір әкімдігі де жан-жақты қолдау көрсетуге міндеттелді. Қаза тапқан әр жұмысшының жанұясына «Қазақмыс» корпорациясы өтемақы төлейді.
«ҚАЗАҚМЫС» КОРПОРАЦИЯСЫ:
«Қаза тапқандардың отбасыларына жұмыскердің орташа жылдық жалақысының 10 еселенген мөлшері және жерлеу рәсімдерін ұйымдастыруға 2 миллион теңгеден төленеді. Сондай-ақ асыраушысынан айырылу жағдайына ай сайынғы төлемдер, балалардың оқу ақысын төлеу, қаза тапқан жұмысшылардың несие және қарыздарын жабу, сондай-ақ отбасы мүшелерінің өтініші бойынша басқа да көмек түрлері қарастырылған».
Қайғылы жағдайды тергеу ісі аяқталғаннан кейін өнеркәсіп және құрылыс министрлігі мыс өндіруші компаниямен арадағы келісімшартты қайта қарап, қауіпсіздік техникасына қатысты шараларды күшейтетін болды.
———————————————
© 2009-, «Жетінші арна». Барлық құқықтар қорғалған.
