Астана қаласындағы Нұра ауданының полиция департаментінде бес жасар баланың бетін пышақпен тілген жасөспірімнің ісі бойынша тергеу өтуі тиіс. Яғни ол арада күдікке ілінген 14 жастағы бала мен зардап шеккен балғынның ата-анасы да болуы мүмкін.
Кешелі-бері әлеуметтік желіде зардап шеккен отбасына белгісіз біреулер материалдық көмек көрсетті деген ақпарат тарады. Яғни жомарт жандар несиелері мен ипотекасын түгел жауып беріпті деген мәлімет бар.
ИНАРА БАРСАҚБАЕВА – ТІЛШІ:
— Біз мұны баланың анасынан сұрап көрген едік. Алайда тұщымды жауап ала алмадық. Сұхбат беруге келіспеді. Жалпы қазір операциядан шыққан балғынның жағдайы түзеліп келеді. Ол үйінде ем алып жатыр. Оның ата-анасына да психологиялық көмек көрсетілген. Бұл отбасы жеке адвокат жалдаған екен. Ендеше сотқа дейінгі тергеу барысы қалай өтіп жатқанын адвокаттың өз аузынан ести аламыз.
ДИНАРА ӘДІЛОВА – АДВОКАТ:
— Күдікке ілінген жасөспірімнің ата-анасына айыппұл салынды. Себебі бала диспансерлік есепте тұрған. Оны біле тұра, сыртқа жалғыз жіберген. Яғни қоғамға қандай да бір қауіп төндіруі мүмкін екенін ата-анасы білді ғой.
ИНАРА БАРСАҚБАЕВА – ТІЛШІ:
— Айта кетейік, күдікке ілінген 14 жастағы бала психо-диспансерлік есепте болған. Сондықтан қазір оның қайда екенін айта алмаймыз. Қолымызда ол туралы нақты мәлімет жоқ. Заң бойынша, мұндай жасөспірімді уақытша ұстау изоляторына қамамайды. Үй қамағында немесе емдеу мекемесінде болуы мүмкін. Бұған дейін құзырлы орган өкілдері тиісті тергеп-тексеру аяқталған соң, күдіктіге қандай шара қолданылатыны айтылады деген болатын.
———————————————
© 2009-, «Жетінші арна». Барлық құқықтар қорғалған.
