Күтпеген қарыз. Мемлекеттік грант бойынша білім алып, оны үш жылдық еңбегіммен өтеп болдым деп сенімді жүрген алматылық жас маман Қаржы орталығының «қара» тізіміне ілінді. Оған 1414 нөмірінен оқу шығынын сот арқылы өндіру туралы sms-хабарлама келген.
Аяжан Сапарғали 2020 жылы Ақтөбедегі университетті «педагогика» мамандығы бойынша грантпен оқып бітірген. Жас маман бірден Алматыдағы мектептердің біріне жұмысқа тұрып, үш жыл мұғалім болып еңбек еткен. Мемлекеттік грантты еңбекпен өтеу міндетінен құтылған соң, жұмыстан шығып кеткен. Сөйтсе, грантқа қатысты шаруа әлі бітпеген.
АЯЖАН САПАРҒАЛИ – ЖАС МАМАН:
— Кеше маған Қаржы орталығынан хат келді. Бұл хатта грантты өтемегенім туралы және менің атыма айыппұл салынатыны туралы айтылған. Бірақ мен 2020 жылы дипломымды алып, Алматыдағы орта мектепке жұмысқа кірдім. Үш жыл жұмысымды істеп, оны жақсы аяқтадым. Енді менде сұрақ. Неге олар менің еңбек тәжірибемді базадан қарай алмайды? Неге мен өз құжаттарымды алып, Астанаға барып, оны дәлелдеуім қажет? Барлық көрсетілген байланыс нөмірі қазір жауап бермейді.
Қаржы орталығына хабарласып, мән-жайды сұрадық. Сөйтсек, Аяжан үшінші оқу жылын аяқтағанымен, үш жылдық толық еңбек мерзімін өтемеген. Яғни, бір айы кем.
ДИМАШ СИСЕНҚҰЛОВ – ҚАРЖЫ ОРТАЛЫҒЫНЫҢ ЖЕТЕКШІ МАМАНЫ:
— Жас маман егер мүмкіншілігі болса, тездетіп жұмысқа орналасқаны жөн. Өйткені қалған уақытын өтеуге міндетті. Егер міндетін орындамаған жағдайда, істемеген уақыттың ақшасын Қаржы орталығына қайтаруы керек. Өйткені ол заңда көрсетілген.
Орталықтағылар қазір түрлі себеппен мемлекеттік грантты өтеуден жалтарып жүрген үш мыңға тарта маманға ескерту жасап, sms-хабарлама жіберіп жатыр. 12 жылдың ішінде елде 296 мың студент мемлекет есебінен білім алған. Оның 116 мыңы жұмысқа тұрған. Ал 64 мыңы тегін оқып бітірген соң, еш жерге қызметке кірмеген. 3 мыңға жуық адам оқу шығынын өз еркімен мемлекетке қайтарыпты. Бұл – 4,4 млрд теңге. 86 мың адам грантты өтеуден мүлдем босатылған.
ФАРАБИ ТҮЗЕЛОВ – ЗАҢГЕР:
— Одан босататын негіздер: түлектің тұратын жерінде бос орын болмауы, бірінші немесе екінші топтағы мүгедектік, оқу бітіргеннен кейінгі магистратура, резидентура, докторантураға түскен жағдайда және жүктілік немесе үш жасқа дейінгі баланы тәрбиелеу.
Заңгердің айтуынша, осы төрт себеп болса ғана, жас маман грантты өтеуден босатылады. Ол үшін оқу орнына барып, комиссиядан хаттамалық шешім алуы тиіс. Жұмыс болмаған жағдайда, еңбек биржасына жұмыссыз ретінде тіркелуі керек. Сонда ғана жұмыссыз жүрген әр күні грантты еңбекпен өтеу ретінде саналады.
———————————————
© 2009-, «Жетінші арна». Барлық құқықтар қорғалған.
