Елорда төрінде «Жұмысшы мамандықтар қаласы» фестивалі ашылды. Жобаның басты мақсты – жұмысшы мамандықтар беделін арттыру, жастарға кәсіптік бағдар беруді жүйелі түрде дамыту.
МАҒЖАН ҮЙСІНБАЙ, ТІЛШІ:
– Фестиваль келушілерге әр саланың, түрлі кәсіптің ерекшеліктерімен танысуға мүмкіндік береді. Бұл алаң жас буынның өз мамандығын таңдап, болашаққа нық қадам жасауына себеп болуы мүмкін.
Қалада түрлі салаға арналған сегіз көше бар. Олар тау-кен ісі және металлургия, машина жасау, көлік, мұнайшылар мен энергетиктер, ауыл, су шаруашылығы мамандары, құрылысшылар, өрт сөндірушілер және медицина көшесі. IT саласы мамандықтарына арналған көше де бар.
ЕДІЛ ОСПАН, ОҚУ-АҒАРТУ ВИЦЕ-МИНИСТРІ:
– Фестивальдің аясында білім беру ұйымдары мен кәсіпорындардың арасындағы өзара ынтымақтастықты дамытудың жақсы үлгілерін көрсетіп жатырмыз. Әрбір қатысушы өндіріс процесінің тікелей әлеміне еніп, өздерін сол өндіріс линиясында отырғандай сезіне алады.
Кәсіби дамудың түрлі саласы мен бағытын көрсететін креативті 40 шақты үй жұрт назарына ұсынылды. Оның ішінде атом өнеркәсібінің стэнді көпшілік арасында ерекше қызығушылық тудырды.
АСУАН СИЯБЕКОВ, АТОМ ЭНЕРГЕТИКАСЫ БАСҚАРМАСЫНЫҢ ЖЕТЕКШІ ИНЖЕНЕРІ:
– Атомның қазір бейбіт мақсатта қолданылатынын жеткізгіміз келеді. Енді салаға келетін болсақ, кадрлар мәселесі қазір жоқтың қасы деп айтуға мүлдем келмейді. Өйткені Қазақстанға атом энергия станциясы мүлде жат нәрсе емес. Осыған дейін бізде АЭС болған. Қазірдің өзінде зертханалық реакторлар жұмыс істеп тұр.
Қала аумағында түрлі тақырыпта семинарлар, шебер-сағаттары және жәрмеңкелер өтеді. Фестиваль 5 күнге созылады.
———————————————
© 2009-, «Жетінші арна». Барлық құқықтар қорғалған.
