Бес жасар балғынның бетін пышақпен тілгілеген ересек баланы қандай жаза күтіп тұр? Кешелі бері осы оқиға ел ішінде қызу талқыланып жатыр. Кейбірі жасөспірімнің ата-анасын қатаң жазалау қажет десе, тағы бірі мұндай жасөспірімнің өзін жазалау керек деген пікірде. Жалпы бұл жағдайға не түрткі болды? Шынымен жасөспірімнің ақыл-есі кем болса, оны әке-шешесі неге жалғыз жіберген?
МАҒЖАН ҮЙСІНБАЙ, ТІЛШІ:
— Күдікті бес жасар баланы дәл осы алаңда байқап, артынан мына кіреберіске аңдып келген. Бас-аяғы 10 секундтың ішінде ол баланың бетін тілгілеп, қашып үлгерген.
Дүкенге кеткен бүлдіршінді анасы терезеден бақылап тұрған. Кіреберіске жеткенге дейін көз алмағанын айтады. Анасы есік ашуға кеткенде, күдіктінің кіргенін байқамады.
АЙНҰР, БАЛАНЫҢ АНАСЫ:
— Ұзақ болған жоқ қой, көрдіңіз бе? 10-15 секунд ұстап тұрған. Менде тіпті күдік те болмады. Домофонға звондады, кірді, лифтпен көтеріліп жатырған. Бір кезде Батыр жүгіріп келді. Есік ашық тұрған. «Мама, мені өлтірді, мені өлтіргісі келді», — деді.
Анасының айтуынша жедел жәрдем келгенше қансыраған балаға алғашқы көмекті дәрігер көршісі көрсетті. Полиция қызметкерлері де дер кезінде жетіп, көп ұзамай күдіктіні қолға түсірді.
ҚУАНЫШ ОРЫНБЕТОВ, ПД БАСТЫҒЫНЫҢ ОРЫНБАСАРЫ:
— Күдікті ретінде психоневрологиялық диспансерде есепте тұрған жасөспірім анықталды. Ол заңды өкілімен бірге дереу полицияға жеткізілді. Қажет тергеу амалдары аяқталған соң, оны оқшалау бойынша шаралар қабылданады. Сонымен қатар оның заңды өкілі баланы тәрбиелеу міндеттерін дұрыс орындамағаны үшін жауапкершілікке тартылды.
Дәрігерлердің айтуынша баланың бетінің 4 жеріне пышақ сұғылған. Операция жақсы өтіп, қазір жағдайы тәуір.
МЕДЕТ НҰҒМАНОВ, № 2 КӨПБЕЙІНДІ ҚАЛАЛЫҚ БАЛАЛАР АУРУХАНАСЫ БАС ДӘРІГЕРІНІҢ ОРЫНБАСАРЫ:
— Баланың бет жағында жарақат болды. Жедел түрде хирургиялық көмек көрсетілді. Қан ағысы тоқтатылды. Қазіргі таңда бала бөлімшеде. Жағдайы тұрақты. Толыққанды емін алып жатыр.
Баланың емханадан қашан шығатын әлі белгісіз. Психологтар өз жұмысын бастап кетті. Ал күдіктіге келер болсақ. Жеткіншектің тағы бір видеосы желіде тарады. Бұл жолы басқа тұрғын үйдің лифтінде кішкентай қызды пышақтамақшы болған. Алайда соңғы сәтте белгісіз себептермен райынан қайтты. Зардап шеккен баланың ата-анасы күдіктінің қатаң түрде жазалануын қалайды.
АЙНҰР, БАЛАНЫҢ АНАСЫ:
— Олар емге келмейді. Оларды емдеу – ақшаның бос кеткені. Оларды түрмеге отырғызу керек немесе өлім жазасына кесілсін.
Денсаулық сақтау министрлігінің деректеріне сәйкес, Қазақстанда мінез-құлық бұзылыстары мен психикалық жағдайы бар 200 мыңға тарта адам тіркелген. Психологиялық ауытқуы бар ересектер адамдар саны 2024 жылы 1 705 адамға өскен. Ақыл-есі кем балалар саны 3 955 балаға ұлғайған. Яғни, бүгінде 27 286 бала бар.
АСХАТ АЙМАҒАМБЕТОВ, МӘЖІЛІС ДЕПУТАТЫ:
— Бұл жерде шектеуден емес, қалай қолдау көрсетуге болады, қалай алдын алуға болады, қандай профилактикалық жұмыстар жүргізу керек, соның ішінде осындай отбасыларға қандай көмек көрсету қажет деген тұрғыдан қарауға тиіспіз. Әрине, жауапкершілік болуы керек, бұл сөзсіз. Қазір қылмыстық іс қозғалды. Ата-аналары жауапқа тартылады. Одан бөлек, психиатриялық қызметке қатысты да тексеріс жүргізіледі.
Мәжіліс депутаты бұл оқиғадан сабақ ала отырып, кешенді жұмыс атқарылу керек екенін айтты. Бұл ретте дәрі-дәрмектердің қолжетімдігін арттыруды атап өтті.
———————————————
© 2009-, «Жетінші арна». Барлық құқықтар қорғалған.
