1 448 доллар, яғни – 730 мың теңге. Голан жотасында БҰҰ бітімгерлік миссиясына қатысып жатқан қазақстандық әскер осындай жалақы алады. Мәжіліс депутаттарына бұл ақша аз болып көрінді. Олар жалпы отырыста біздің бітімгерлерге қандай жағдай жасалғанын, олардың қауіпсіздігі мен қосымша төлемақылар туралы Қорғаныс министрлігі өкілінен сұрады. Вице-министрдің айтуынша, біздің әскер Голан жотасында былтыр жыл соңында болған шиеленісті тоқтатуға қатысқан жоқ. Тек Дамаск қаласынан тұрғындарды қауіпсіз жерге көшірумен айналысқан. Әйтсе де мәжілісмендер біздің сарбаздар сыртта аш жүр ме деп алаңдаулы.
ЕРБОЛАТ САТЫБАЛДИН, МӘЖІЛІС ДЕПУТАТЫ:
— Сіз 1448 доллардан басқа әрбір сарбазға тағы үш айлық өтемақы төленетінін айттыңыз. Ол ай сайын төлене ме әлде бірреттік пе? Контингенттің әскери қызметшілері даладағы миссиядан тікелей 1,28 доллар, бұл 700 тг көлемінде тәулікақы алады. Сонымен қатар әр алты ай сайын 15 күндік демалыс күніне 11,5 доллар көлемінде жәрдемақы беріледі, бұл – 90 мың теңге. Енді «Тасып жатыр бойда батыр рух» деп жүрген әскер 700 теңгемен, тәулікақымен қалай рух жинайды? Ашқұрсақ әскердің рухы болуы мүмкін бе?
ШАЙХ-ХАСАН ЖАЗЫҚБАЕВ, ҚОРҒАНЫС МИНИСТРІНІҢ ОРЫНБАСАРЫ:
— Айына 1448 доллар жалақы алады. Одан бөлек ай сайын қалта шығынына 40 доллар және жыл біткен соң 345 доллар демалыс өтемақысы беріледі. Қазақстан Республикасының атынан төленіп отырған үш еселенген айлық жалақысы бірмезеттік емес, ай сайын төленеді. Елге келгеннен кейін санаторлық-курорттық емдеу тегін беріледі. Сол жақта болған әрбір айы 1,5 ай болып есептелінеді. Кейін зейнетке шыққанда, уақыты 1,5 еселенеді. Қаза тапқан жағдайда 60 айлық мөлшермен БҰҰ атынан 77 мың долларға дейін төлемақы бекітілген.
———————————————
© 2009-, «Жетінші арна». Барлық құқықтар қорғалған.
