Өскемендегі қоқыс полигоны қала іргесіне жетті

Өскемендегі тұрмыстық қалдық полигоны лық толып, бір шеті Шмелёв Лог ауылына жетті. Жауаптылардың оны жабамыз дегеніне бірталай уақыт болған. Алайда күрмеулі мәселе әлі шешімін табар емес. Тау болып үйіліп жатқан қалдық иісі, әсіресе күн жылыған кезде осы маңда тұратын халықтың берекесін қашырады. Ал жаңа полигон қашан салынады? Бұл сұраққа қатысты жергілікті билік өкілдерінің пікірі қандай?
Өскеменнен шығарылған қоқыс Степное ауылы маңына төгіледі. Бүгінде тау болып үйілген қалдық қоршауынан асқан. Қатты жел тұрса, қағаз целофан айналаға шашылады. Ал күн жылынса, қолаңса иіс қолқаны қабады. Тұрғындардың берекесі қашады.
ЖАНАР ОСПАНОВА, СТЕПНОЕ АУЫЛЫНЫҢ ТҰРҒЫНЫ:
— Шынын айтқанда, өмірімізді де улап жатыр. Жерасты суының бәрі бұзылған. Ең соңғы көше – Планирная көшесін барып көрсеңіздер, суды ішуге келмейді. Басында шошқа қора тұр. Оның жанындағы қоқыс полигонына 68 жыл болды. Енді біздің талап-тілегіміз – осы қоқыс төгетін орынды жабу. Бірақ, міне, әлі күнге дейін жабылмай тұр.
Бүгінге дейін мұнда 7 миллион тоннадан астам қалдық жиналған. Осыдан бес жыл бұрын ол жабылуға тиіс еді. Қалалық әкімдік өкілдері 15 жылдан бері учаске қарастырып әлек. Алайда бірі – әуежайға, енді бірі елді мекендерге жақын.
РАШИД ШЕРУБАЕВ, ҚАЛАЛЫҚ ТКШ БӨЛІМІ БАСШЫСЫНЫҢ ОРЫНБАСАРЫ:
— 2020 жылы қалдықтарды сұрыптайтын зауыт салынды. Ал бұл кәсіпорын Ушанов ауылынан алыс емес. Сондықтан осы аумақтан жаңа қоқыс полигонын ашқан тиімді болар еді.
Жауаптылардың айтуынша, бұл жер зауыттан 12 шақырым жерде. Алайда елді мекен халқы: «Бұл маңайға қоқыс төгуге жол бермейміз», — деп отыр.
ДӘУРЕН МОЛДАМСЕЙІТОВ, УШАНОВ АУЫЛЫНЫҢ ТҰРҒЫНЫ:
— Ертең зардабын біз тартамыз ғой. Қоқыс айналаға жайылады. Кептеліс болады, жағымсыз иіс тарайды. Құрт-құмырсқа, егеуқұрық қаптайды. Ол бізге керек пе?
Дегенмен әзірге басқа нұсқа жоқ. Жауапты мамандар соңғы үлгідегі технологияны пайдаланып, қоқыс өңдейтін зауыт та салуға дайын. Тек инвестор қажет. Жоба құны – 80 миллиард теңге.
ЕЛАМАН МҰХТАРХАНОВ, ТАБИҒИ РЕСУРСТАР БАСҚАРМАСЫ БАСШЫСЫНЫҢ ОРЫНБАСАРЫ:
— Инвесторға 15 жылға дейін 3% жеңілдетілген несие беріледі. Қайта өңдеу не болмаса сұрыптау желісін салатын болса, тек 2 жылдан кейін қарызын қайтара бастайды. Жобаға кез келген инвестор қатыса алады. Шектеу жоқ.
Жобаны тездетіп жүзеге асырмаса болмайды. Себебі ескі полигон аузы-мұрнынан шығып тұр.
———————————————