Аралға су толып, тіршілік жанданып келеді

«Арал теңізі кемеріне толып, ондағы тіршілік жанданып келеді. Болашақта оның құрғап қалған табаны ну орманға айналады», — дейді мамандар. Мәселен, былтыр күзден бері кіші Арал теңізіне 1 миллиард текше метр cу құйылған. Бұл жоспарлы межеден 100 миллион текше метрге артық. «Көкарал бөгетін сақтау және Сырдария өзені сағаларын қалпына келтіру» жобасы аяқталуға жақын. Жоба аясында егіс алқабын суарудың тиімді технологиясы қолға алынып, үнемделген 200 миллион текше метр су теңізге жіберіліп жатыр.
Бұрын егін суару кезеңінде Аралға өте аз мөлшерде су беріліп келді. Трансшекаралық өзеннің суын бөлісуге қатысты орталық Азия елдерімен жасалған келісімнің нәтижесінде теңізге құйылатын көлем едәуір ұлғайды.
ЖОРАБЕК НҰРЫМБЕТОВ, ОБЛЫСТЫҚ МӘСЛИХАТ ДЕПУТАТЫ:
— Жоғарыдан келетін судың көлемінің аз болуына байланысты жаз айларында Арал теңізіне түсетін судың көлемі өте аз болатын, секундына 5-10 куб су түсетін. Былтырғы жылы 977 миллион куб су түсті. Келер жылы да дәл сондай су алу жөнінде жұмыс жасалып жатыр.
Солтүстік Арал теңізінің ауданы ұлғайып, бүгінде 3065 шаршы шақырымға жетті. Бұл 2022 жылғымен салыстырғанда 111 шақырымға көп.
ЗЕЙНУЛЛА ҚАЗТОҒАНОВ, «АРАЛ-СЫРДАРИЯ» БИ БАСШЫСЫНЫҢ МІНДЕТІН АТҚАРУШЫ:
— Негізгі 27 миллиард текше метр су жиналған кезде Балтық жүйесі бойынша судың деңгейі 42 метр болуы керек. Ал бізде 2022 жылы 40 метр 42 сантиметрге түсіп кетті, сол кезде судың көлемі 18 миллиард 500 миллион текше метр су болған. Қазір кіші теңізде 22 миллиард 150 миллион текше метр су жинақталды. Судың деңгейі 41 метрде тұр.
Мемлекет басшысының тапсырмасына орай, теңіздің құрғап қалған табанын көгалдандыру жұмыстары да жалғасады. Жыл соңына дейін жасыл желектің жалпы көлемін 1,1 миллион гектарға жеткізу жоспарланып отыр.

СЕРІК СЕРМАҒАМБЕТОВ, ОБЛЫСТЫҚ ТРТПР БАСҚАРМАСЫНЫҢ БАСШЫСЫ:
— Фитомелирациялық жұмыстарды жүргізу үшін 217 тонна тұқым жиналып, себу жұмыстары атқарылды. Осы жылдың аяғына дейін бұл тапсырманы толық орындап шығамыз деп отырмыз. Негізінен, жыл сайын 250 мың гектар егу жоспарлануда.
Қазір солтүстік Арал теңізіндегі су көлемі 22 миллиард текше метрден асты. Мамандар жыл соңына дейін су қоры тағы 1 жарым миллиард текше метрге ұлғаяды деп отыр.
———————————————