Бензин 2 теңгеге қымбаттады @TheSevenNews​

Бензин мен дизель отыны қымбаттады. Елдегі ірі жанар-жағармай бекеттері таблодағы санды бір түнде өзгертіп қойған. Ал шағын бекеттер әлі де бұрынғы бағаны ұстап отыр.
ГҮЛВИРА СЕЙТЕНОВА – ТІЛШІ:
— Бағасы еркіне жіберіледі дегелі тура екі апта өткенде елде бензин қымбаттай бастады. Бұрынғы құнына 2 теңге қосылып, қазір жанар-жағармай құю бекеттерінде литрі 207 теңгеден құйылып жатыр.
207 теңге деген бағаны ірі жанармай бекеттері желісінен байқадық. Шағын бекеттерде АИ-92 маркалы бензин 205 теңгеден сатылуда. АИ-95-тің литрі 263-268 теңге болса, дизель отыны да 2 теңгеге қымбаттаған, қазір бағасы – 297 теңге.
Өңірлерде баға әртүрлі. Мысалы, Ақтөбедегі жанармай бекетінде АИ-92-нің литрі 200 теңге, АИ-95 – 243 теңге, дизель отыны – 295 теңге. Шымкентте АИ-92 – 195 теңге, АИ-95 – 255 теңге, дизель отыны – 290 теңгеден құйылып жатыр. Қазақстан жанармай қауымдастығы: «Бұған мемлекет 1 ақпанда көлік отыны бағасын реттеуді тоқтатқаны себеп», – дейді. Содан бері жанармай жеткізушілер көтерме бағаны өсіріп жіберген. Енді бөлшек саудадағы бензин ай біткенше біртіндеп 4 теңгеге қымбаттайды.
Ресурс иелері, соның ішінде жанармай нарығының 80 пайызын бақылайтын KC Energy Group пен «ҚазМұнайГаз» 1 ақпанда көтерме бағаны көтерді. Бөлшек сауда иелері қазірдің өзінде ақпан айындағы жанармай көлемін қымбат бағамен сатып алып жатыр. Осылайша, дизель отыны мен АИ-92 маркалы бензиннің көтерме бағасының орташа өсімі литріне 4 теңгені құрады. Сәйкесінше, ақпан айының соңына дейін ескі бағамен жинақталған көлемдерге байланысты жанар-жағармайдың бөлшек саудадағы бағасы литріне 4 теңгеге қымбаттайды.
Қауымдастық өкілдері: «Бензин құнына қосылған 4 теңгенің 80 пайызы немесе 3 теңгесі айналып келгенде акциз түрінде мемлекеттік бюджетке түседі», – дейді.
———————————————