Қостанай облысының дәрігерлері науқастардың емдеу процесін қашықтан бақылайтын онлайн кеңес беру жүйесін енгізді. Жаңа бағдарлама ең алдымен шалғай елді мекенде тұратын немесе жүріс-тұрысы қиын азаматтарға қолайлы болып тұр. Облыстық аурухана ақхалаттылары бұл қызмет түрін өткен жылдың соңында енгізген болатын. Алғашқы бетпе-бет қабылдауда толық тексерістен өткен пациенттің одан кейінгі ем-дом жасау барысын дәрігерлер мессенджер арқылы онлайн қадағалап отырады. Тұрғындар тарапынан әсіресе невропатолог, уролог және гастроэнтерологқа жүгінгендер қатары көп. Білікті мамандардың электронды форматта кеңес беру қызметіне жолдаманы қостанайлықтар тұрғылықты жеріндегі емханадан алады. Сондай-ақ науқастарды қолдау қызметіне хабарласып, онлайн-қабылдауға тіркелуге болады.
СӘУЛЕ МЕҢДІҚҰЛОВА – ОБЛЫСТЫҚ АУРУХАНА ЖАНЫНДАҒЫ ЕМХАНА МЕҢГЕРУШІСІ:
— Кеңес берудің 2 түрі бар: аудио және бейне байланыс. Таңдау тұрғынның өз еркінде. Біз Қостанай облысы бойынша жұмыс істейміз. Қалалық емханалар да онлайн кеңес алып тұрады. Бұл, әсіресе, мүмкіндігі шектеулі жандар мен қарияларға тиімді.
———————————————
© 2009-, «Жетінші арна». Барлық құқықтар қорғалған.
