Шымкентте 52 мектеп аттестациядан өте алмады @TheSevenNews​

Шымкенттегі мектептің үштен бір бөлігіне жуығы білім сапасын қорғай алмай көш соңында қалған. 52 мектеп аттестациядан өте алмады. Ол аздай 55 мұғалім сынақты 3 рет тапсырып, үшеуінен де құлаған. Шекті балды жинай алмағандар тізімінде 25 жылдық өтілі бар мұғалім де жүр. Олар әрі қарай балаларға білім беруін жалғастыра ма?
Шымкенттегі №39 жалпы орта мектепте бес бірдей мұғалім білім сапасын анықтайтын аттестациядан өтпеді. Олар тестілеуден бір емес, үш рет сүрініпті. Сынақтан сүрінгендер тізімінде мектепте 14 жыл қызмет істеген мұғалім де жүр.
БАУЫРЖАН ҚАРАБОТА – №39 ЖАЛПЫ ОРТА МЕКТЕБІНІҢ ДИРЕКТОРЫ:
— Өздерінің айтуы бойынша, түрлі себептерге байланысты тестке кірген кезде стресте болдық деді, компьютермен онша жұмыс істей алмадық деп түрлі сылтаулар айтты. Жұмыстан шығарып жіберген жоқпыз, 3 рет тестке барып өте алмағандықтан, білім сапасының төмендеуіне байланысты ол кісілерге шара қолдандық.
Тестілеуден сүрінген мұғалім тек бұл мектепте ғана емес. Мегаполистегі 55 мұғалім үш мүмкіндікті де жіберіп алған. Олар 25 сұрақтан тұратын тесттен шекті 16 балды да жинай алмады.
АҚЖАРҚЫН ТҰРСЫНОВА – ӘДІСТЕМЕЛІК ОРТАЛЫҒЫ ДИРЕКТОРЫНЫҢ ОРЫНБАСАРЫ:
— 36-сы бастауыш сыныптарының мұғалімі болып тұр. Демек, бастауышта дұрыс білім бермей жатқан мұғалімдер анықталып жатыр. Сегіз ағылшын пәнінен беретін мұғалім, қалған пәндерден бір-екеуден болып, 55 санын құрап тұр.
Шымкент қаласында олқылығы көп 74 мектеп болса, соның қырығы биыл сынақ тапсырды. Ал жалпы білім беретін 160 мектептің 52-сі аттестациядан өте алмаған. Бұл дегеніңіз – үштен бір бөлігіне жуығы білім беру сапасын дәлелдей алмады деген сөз.
СӘРСЕН ҚҰРАНБЕК – ҚАЛА ӘКІМІНІҢ ОРЫНБАСАРЫ:
— Шымкент қаласы барлық өңірдің арасында білім сапасы бойынша 20 орынның жиырмасыншысында тұрақтап тұр. Қаламыздағы 150 мектептің 74-і бүгінгі таңда мақсатты мектептердің санатына жатады. Кадр құрамындағы құқықбұзушылықтар, біліктілігін арттыру бойынша өтеген 579 педагог болған, 5 жылда бірде-бір рет өзінің санат деңгейін арттырмаған 124 педагог болған.
Айта кетейік, Шымкент қаласындағы мектептерде 22 мың мұғалім жұмыс істейді. Ал алты білім ордасы қазір басшысыз отыр.
ГҮЛДАНА СЕЙДРАСУЛ – ТІЛШІ:
— Анықталған олқылықтар тек білім сапасына қатысты емес. Тоғыз мектепте асханаға берілетін санитарлық-эпидемиологиялық қорытынды болмай шықса, 36 білім ошағында медициналық қызмет шарты жоқ. Ал 28 мектепте балалар ауызсумен қамтылмаған.
———————————————