Петропавлда морж қыздардың қатары көбейді

Петропавлда морж қыздардың қатары көбейді. Сақылдаған сары аязда санын жалтыратып суға түсу модаға айналған. Күн сайын 300-ге жуық адам Есіл өзініндегі ойыққа күмпиді. Оның 20-дан астамы – әйел.
Солтүстіктің сарышұнақ аязын петропавлдық морждар шыбын шаққан құрлы көрмейді. Тіпті -30 градус болса да, олар Есіл өзеніне жиналады. Осылайша, мұздай суға сүңгіп, денсаулығын шынықтырады.
Гүлжан Құсайынованың салауатты өмір салтын ұстанып жүргеніне үш жыл болған. Спортпен тұрақты түрде айналысады. Әрі сақылдаған сары аязда суға шомылады. Айтуынша, мұндай қадамға бару үшін адам алдымен психологиялық тұрғыдан дайын болуы керек.
ГҮЛЖАН ҚҰСАЙЫНОВА, ҚАЛА ТҰРҒЫНЫ:
— Алғашында, әрине, қорқыныш болды. Бірақ тәуекел деп суға күмп еттім. Содан бері міне үшінші маусым шомылып жатырмын. Жүрек-қан тамыр жүйесі жақсарып, өзімді сергек сезіне бастадым. Көңіл күйім де әркез көтеріңкі. Қысқасы, суық тию, тұмау секілді ауруларды мүлдем ұмыттым.
Суға түспес бұрын денені қыздырып алған жөн. Сондықтан морждар алдымен жүгіреді, сосын жаттығу жасайды. Артынша суға сүңгиді.
ЕРІК МАГАМБЕТОВ, КЛУБ ЖЕТЕКШІСІ:
— Салқын суға түскенде дұрыстап тыныс алу қажет. Бұл аса маңызды. Артынша 30-40 секунд шомылу жеткілікті. Одан артық түсуге болмайды. Бұл керісінше денсаулыққа зиян болуы мүмкін. Аптасына 2-3 мәрте суға шомылсаң, иммунитетің жақсарады.
Петропавлда морждардың клубы осыдан 8 жыл бұрын құрылған. Қазір 300-ге жуық тұрақты мүшесі бар. Ауырып ем іздегенше, ауырмаудың жолын тапқан бұл жандар күнде өзен жағасында бас қосады. Салауатты өмір салтын ұстанған жандар өз қатарларының көбейгенін қалайды.
———————————————