Қосымша құн салығын 16% көтеру мұнайға тәуелділіктен арылтады

Қосымша құн салығын 16% дейін көтеру бюджетті мұнайдан түскен табысқа тәуелділіктен арылтады. Үкімет отырысында вице-премьер Серік Жұманғарин осы тақырыпта баяндама жасады. Оның айтуынша, ауыл шаруашылығы тауарын өндірушілерді қосымша құн салығынан біржола босату көзделіп отыр. Салық заңнамасына тағы қандай өзгеріс енгізу көзделген?

Вице-премьер – Ұлттық экономика министрі Серік Жұманғарин әуелі салық заңнамасындағы жаңа түзетулерге тоқталды. Осы арада қосымша құн салығын 16% дейін ұлғайту ұсынылды. Бұл қадамның қазынаға 4-5 трлн теңге кіріс әкелетіні айтылды.

СЕРІК ЖҰМАНҒАРИН, ПРЕМЬЕР-МИНИСТРДІҢ ОРЫНБАСАРЫ:
– Қосымша құн салығы – қазына қаражатын толтырудың негізі көзі. Бюджеттің 25% құрайды. Осы ретте міндетті тіркеу есебіне қою үшін шектік мөлшерді 80 млн теңгеден 15 млн теңгеге дейін төмендетуді ұсынамыз. Қосымша құн салығының базалық мөлшерлемесін ұлғайту бюджеттің мұнайдан түсетін кіріске тәуелділігін төмендетуге, маңызды жобаларды қаржыландыруға мүмкіндік береді.

Денсаулық сақтау саласының кәсіпорындарына 10% салық төлеу ұсынылып отыр. Ал азық-түлік өндірушілер бұған дейін бюджетке қосымша құн салығының 30% төлеп келген. Жаңа салық кодексі қолданысқа енгізілген жағдайда шаруалар салықтың бұл түрінен толық босатылады. Алайда Ауыл шаруашылығы министрінің айтуынша, бұл жергілікті өнім бағасына айтарлықтай әсер етпейді. Себебі шаруалардың шығыны көп.

АЙДАРБЕК САПАРОВ, АУЫЛ ШАРУАШЫЛЫҒЫ МИНИСТРІ:
– Қалай дегенмен шаруалар материалдық-техникалық базаларын жаңартады, тұқым, жанар-жағармай, тыңайтқыштарды сатып алады. Сондықтан олар қосмыша құн салығынан босатылса да, көкөніс бағасы арзандайды деп айта алмаймын. Бірақ бағаны тұрақты ұстау үшін кешенді шаралар жасалады.

Министрдің пайымынша, салық кодексіндегі жаңа түзетулер отандық көкөніс сапасының бәсекеге қабілеттілігін арттыруға септігін тигізеді. Өйткені қазір елімізде шаруашылық саны артып келеді. Республика бойынша 300 шаруа қожалығы тіркелген.

ИНАРА БАРСАҚБАЕВА, ТІЛШІ:
— Үкімет басшысы Олжас Бектенов жаңа салық заңнамасының тетіктерін тұрғындарға барынша тәптіштеп түсіндіру керек екенін қадап тапсырды. Осы мақсатта өңірлерде Үкіметтің бастамаларын талқылайтын алты жұмыс тобы жасақталды. Жергілікті жерлерде бизнес өкілдерімен кездесулер ұйымдастырылмақ. Жаңа салық кодексіне түзетулер 20 ақпанға дейін енгізіліп, Мәжіліске ұсынылмақ.
———————————————