«Заречный» шағын ауданын жыл сайын топан су басады

Есіл өзенін жағалай қонған «Заречный» шағын ауданының халқын жаппай көшіру жоспарланып отыр. Петропавл қаласының шетіндегі бұл аймақ қауіпті саналады. Көктем сайын құтқарушылардың ұйқысы, тұрғындардың күйі қашады. Өйткені бұл маңды топан су басады. Жергілікті билік пәтерде және жер үйде тұратындарға баспана, ал саяжай тұрғындарына басқа жақтан жер учаскесін ұсынған. Бірақ мұндағы 40-тан астам отбасы бұл шешіммен келіспей отыр.

Әбдірахмановтар отбасы Петропавлға 2019 жылы көшіп, саяжай учаскесінен үй салған. Былтыр көктемде оны су басып, шатырына дейін көтеріліпті. Жөндеу жұмыстарына деп мемлекет тарапынан 4 миллион теңге көлемінде өтемақы берілді. Алайда шаруалар әлі аяқталмады. Үш бала бағып отырған жас отбасы биыл тағы судың астында қаламыз ба деп үрейленіп отыр.

РАУШАН ӘБДІРАХМАНОВА, ҚАЛА ТҰРҒЫНЫ:
– Саяжай учаскесінде орналасса да, бұл біздің жалғыз үйіміз. Былтыр мемлекет қолдан келгеннің барлығын жасады. Ал биыл ешқандай көмек болмайды деп жатыр. Сонда ертең су астында қалсақ, біз қайда барамыз? Ал баспанымызды салған кезде бізге ешкім тыйым салған жоқ қой. Сондықтан билік біздің мәселемізге назар аударып, көмек көрсетсе дейміз.

Есіл өзінің бойында орналасқан «Заречный» шағын ауданында 250 түтін бар. 160 отбасы пәтерде, қалғаны жер үйде тұрады. Жылда бұл аумақты су басқандықтан, жергілікті билік биыл мұндағы халықты басқа жаққа көшіруге шешім қабылдады. Ол үшін қаланың ортасынан жақында екі бірдей көпқабатты үйдің құрылысы басталады. Айта кету керек, тұрғындарға үй немесе өтемақы алуға таңдау берілді. Ал саяжай аумағында тұрып жатқандары тек жер учаскесін ала алады.

ӘСЕМ АЙТУЛОВА, ҚАЛА ӘКІМІНІҢ БАСПАСӨЗ ХАТШЫСЫ:
– Саяжай жалғыз баспана деген ұғым жоқ. Бірақ өткен жылы қайырымдылық фондтардың көмегімен бізге қаржы бөлінген болатын. Қайта құруға жарамайтын үйлер «Бірлік» ауданына көшірілді. Ал жөндеу жұмыстарын жасауға болатын үйлерге қаражат бөлінді. Бірақ айтып өткенімдей, заңда ондай ұғым жоқ. Сондықтан да барлық жұмыстар заң аясында жүзеге аса болады.

Бүгінде сайжайды пана еткен 40 отбасы не істерін білмей дал. Ал көктем болса жақындап қалды. Шаhарда тасқынға қарсы шаралар басталып кетті. Қазір осы аумақта Есіл өзенімен келетін судың арнасын бұру үшін айналма каналдың құрылысы басталды.
———————————————