«Үкімет пен әкімдердің жұмысы қаншалықты тиімді екенін алдымен экономиканың даму көрсеткіштері мен азаматтардың тұрмыс сапасына қарай бағалаймыз». Үкіметтің кеңейтілген отырысында Мемлекет басшысы осылай айтты. Қасым-Жомарт Тоқаевтың төрағалығымен өткен жиында еліміздің 2024 жылғы әлеуметтік-экономикалық дамуы қорытындыланып, алдағы кезеңге арналған негізгі міндеттер айқындалды.
Мағжан Үйсінбай, тілші:
— Отырыс барысынында Президент Қасым-Жомарт Тоқаев Үкімет мүшелері мен өңір басшыларының өткен жылғы жұмысына баға бере отырып, олардың басты назарын елдегі өзекті мәселелерге аударуын ескертті.
Президент елдің әлеуметтік-экономикалық даму барысына оң бағасын берсе де, атқаратын жұмыстың әлі де көп екенін алға тартты.
Қасым-Жомарт Тоқаев, Қазақстан Республикасының Президенті:
— Сырттағы ахуал күрделі болса да, елімізде жақсы нәтижелер бар. Ел экономикасы өсіп жатыр. Бірақ шешімін таппаған түйткілдер әлі де көп.
Бірінші болып баяндама жасаған Премьер-министр Олжас Бектенов сан-салада қарқынды даму бар екенін баса айтты. Жалпы Үкімет жұмысының нәтижелерімен бөлісті.
Олжас Бектенов, ҚР Премьер-министрі:
— Өткен жылы экономика 4,8% өсті. Ауыл шаруашылығында – 13,7%, құрылыста – 13,1%, саудада – 9,1%, көлікте 8,5% деңгейінде өсімге қол жеткізілді. Өңдеу өнеркәсібінің көлемі 5,9% ұлғайды. Аграрлық сектор мен өңдеуші салада соңғы 10 жыл ішіндегі ең қарқынды өсім тіркелді.
Мағжан Үйсінбай, тілші:
— Мемлекет басшысы әлем экономикасындағы тарифтік тартыстар мен санкциялық текетірестердің салдарына, климаттың өзгеруіне және жасанды интеллектіні дамытуға қатысты стратегия керек екенін ескерді.
Ал Премьер-министрдің орынбасары – Ұлттық эконмика министрі Серік Жұманғарин жаңа салық реформасын ұсынды. Ол қосымша құн салығы бойынша шекті 15 миллион теңгеге дейін төмендетуді көздейді. Яғни қосымша құн салығын 12-ден 20% дейін көтеру мәселесі алға тартылып отыр. Қасым-Жомарт Тоқаев бұл мәселені толық зерттеуді тапсырды.
Қасым-Жомарт Тоқаев, Қазақстан Республикасының Президенті:
— Мәселені түбегейлі зерттеп, талқылау керек. Биыл Салық кодексіне баса назар аударған жөн. Қателесуге құқығымыз жоқ.
Президент Үкіметтің және басқа да құзырлы органдардың жақын арадағы негізгі міндеттеріне жеке-жеке тоқталды. Экономиканы әртараптандыру, инвестиция саласындағы жұмысты күшейту, инфрақұрылымды дамыту ісін жаңа деңгейге көтеру, цифрлық технологияны жан-жақты енгізу, энергетиканы дамыту және ядролық кластер құру, агроөнеркәсіп кешенінің әлеуетін арттыру, салық-бюджет саясатын реформалау, маңызды жобаларды қаржы көздерімен қамтамасыз ету, әлеуметтік қолдау ісін реттеп, денсаулық сақтау, білім беру және ғылым саласын одан әрі дамытуды жүктеді.
Мағжан Үйсінбай, тілші:
— Жиынды қорытындылай келе Мемлекет басшысы қажет реформаларды енгізіп, олардың нақты бағытта іске асуын бұйырды. Одан бөлек, ел эконмикасын дамыту үшін Үкімет жаппай үнемдеуге көшіп, бюджет қаржысын өзекті мәселелерді шешуге жұмсау қажет екенін атап өтті.
———————————————
© 2009-, «Жетінші арна». Барлық құқықтар қорғалған.
