Мұнай өндірісін ұлғайту – кезек күттірмейтін мәселелердің бірі. Өйткені бұл – ел экономикасына оң әсер ететін негізгі фактор. Бірақ ел ішінде жанар-жағармай бағасы арзандайды деген сөз емес. Керісінше келесі айдан бастап бағаны біртіндеп көтеру жоспарланған. Себебі Қазақстанда жалпы ТМД елдері бойыша баға әлдеқайда арзан. Соның салдарынан отандық жанар-жағармайды сырттан сатып алушы көп. Бұл ішкі нарықта тапшылықтың туындауына түрткі болады. Мемлекет басшысының төрағалығымен өткен Үкіметтің кеңейтілген отырысынан соң, тиісті ведомство өкілдері журналистердің сұрақтарына жауап берді.
Инара Барсақбаева, тілші:
— Президенттің қатысуымен өтетін Үкіметтің кеңейтілген отырысында журналистер үшін онлайн трансляция екі залда ұйымдастырылды. Маңызды жиыннан ақпарат тарату үшін әріптестерімнің қазір дайындалып жатқанын көруге болады.
Тілшілер құрал-жабдықтарын сайлап, шұғыл ақпарат таратуға әзірленіп жатыр. Бұл жолы журналистерге шенеуніктермен жүздесуге мүмкіндік болмады. Себебі олар Үкімет үйне басқа есіктен кірді.
Инара Барсақбаева, тілші:
— Үкіметтің отырысынан кейін журналистер үшін баспасөз мәжілісі ұйымдастырылды. Оған шамамен 30 журналист қатысты. Бас спикер Үкімет Басшысының орынбасары – Ұлттық экономика министрі Серік Жұманғарин алдымен салық заңнамасындағы өзгерістер, бюджеттік реформалар төңірегінде баяндамасын оқыды. Кейін бұқаралық ақпарат құралдарының өкілдері вице-премьерге өз сұрақтарын жолдады. Қойылған сауалдардың басым бөлігі бензин бағасы, қосымша құн салығының өсуі сияқты мәселелерді қамтыды.
Серік Жұманғарин, ҚР Премьер-министрінің орынбасары – Ұлттық экономика министрі:
— Қарапайым кәсіпкер 12% төлейді. 16-дан 20% дейін көтереміз деп жоспарлаймыз. Орташа кәсіпкерге жүктеме 4%.
Бензин бағасы – көпшіліктің көкейінде жүрген өзекті мәселелердің бірі. Экономика министрі оған қатысты былай деді.
Алмасадам Сәтқалиев, ҚР Энергетика министрі:
— Сұйытылған газ бен бензиннің бағасына қатысты тиісті шешім шығарылды. Жанар-жағармай мен сұйытылған газдың құны ақпан айының басында қымбаттайды. Аталған өнімдердің бағасы күрт шарықтап кетпес үшін Үкімет жергілікті атқарушы органдармен нормативтік-әкімшілік бақылау жүргізеді.
Инара Барсақбаева, тілші:
— Баспасөз мәжілісі екі сағатқа жалғасты. Брифингте Үкімет басшысының орынбасары – Ұлттық экономика министріне 30-ға жуық сұрақ қойылды. Мемлекеттік органдардың жұмысына қатысты сын ескертпелер де айтылды. Ведомства өкілдері бұл бағытта кешенді жұмыстар қолға алынатын жеткізді.
———————————————
© 2009-, «Жетінші арна». Барлық құқықтар қорғалған.
