Қарағандының дендрожоспары неге құпия сақталып отыр?

Қарағандыда экологтар мен белсенділер Дендрожоспарға қол жеткізуді талап етіп отыр. Бұл – ағаштарды есепке алу үшін жасалған арнайы бағдарлама. Кеншілер астанасында экологиялық жағдай онсыз да нашар, сондықтан қала тұрғындары жасыл желекті өздері қорғауға кіріскен. Белсенділердің айтуынша, ағаш туралы барлық деректі енгізу үшін бюджеттен 65 миллион теңге жұмсалған. Бірақ атқарылған жұмыс «құпия».
Соңғы жылдары қарағандылықтар қаладағы жасыл желектің жай-күйіне қатты алаңдап отыр. Өйткені қала маңында өнеркәсіп орындары өте көп болғандықтан,топырақ пен климат өсімдіктердің өсуіне аса қолайлы емес. Оның үстіне зиянкестердің кесірінен зардап шеккен ағаш қатары көбейіп, шіри бастаған. Экобелсенділердің айтуынша, қалада әлі күнге дейін ағаштардың нақты есебі жоқ. Бұл жұмыстарға бюджеттен 6 жыл бұрын қаражат бөлінгенімен, Қарағандының дендрожоспары әлі жарияланбаған.

ДМИТРИЙ КАЛМЫКОВ – ЭКОЛОГ:
— 60 миллион теңгеден астам қаржы жұмсалыпты. Маслихат бекіткен ережеге сай, дендрологиялық жоспар болуы керек. Көптеген сұрауларға қарамастан, бұл кестені ешкімге көрсетпеді, еш жерге жарияламады. Мәселен, Алматыда мұндай мәліметтер мобильді қосымшада қолжетімді. Тіпті үйіңіздің жанындағы ағаш туралы, оның қай түрге жататынын, жасын, диаметрін, биіктігін және тағы басқа ақпаратты көре аласыз. Бізде мұндай ашықтық жоқ.

Нормативке сай, реестрде әр ағаштың түрі, жасы және қазіргі жағдайы жазылуы керек. Бірақ белсенділердің айтуынша, бүгінгі күнге дейін ондай мәлімет қағаз түрінде де, онлайн-платформада да жоқ.

ЖҰМАБАЙ ЫСҚАҚОВ – БЕЛСЕНДІ:
— Іс жүзінде бұл реестр жоқ. Жұмыс актілеріне қол қойылған, үш CD-диск, бір-екі брошюра тапсырылған деп жазылған, қағаз түріндегі реестр болуы керек делінген. Бірақ қағазда ештеңе жоқ, дискілер істемейді, өйткені база Алматыдағы серверде, ал ол серверге ешкім қызмет көрсетпейді.

Шенеуніктердің айтуынша, бөлінген қаржы дендрожоспарды жасауға емес, қала аумағындағы жасыл-желекті есепке алуға жұмсалған. Олардың сөзінше, тиісті деректер базасы бар, бірақ оған «әркім» қол жеткізе алмайды екен.

РҮСТЕМ ҚОЖАҚАПАНОВ, ҚАЛА ӘКІМІНІҢ ОРЫНБАСАРЫ:
— Бұл ақпарат бағдарлама әкімшісіне ғана қолжетімді. Ол жұмысқа арналған бағдарлама, тек белгілі бір адамдарға ғана ашық. Қағаз түрінде де бар, электронды нұсқасы да тек рұқсат етілген адамдарға ғана қолжетімді.

Белсенділер мұндай жауаппен келіспейді, әрине. Олар толық ашықтықты талап етеді. Сарапшылардың айтуынша, Қарағандыдағы ағаштардың шамамен 70 пайызы кәрі, ал жас көшеттердің бәрі бірдей жерсініп кетпейді.
———————————————