«Басты рөл – 1,5 млн теңге»: ата-аналар киностудиялар жұмысын сынға алды

Лимузин, қызыл кілем, танымалдылық! Балаларды осылай қызықтырып, кастингке шақырып жатқан жекеменшік киностудиялар көбейді. Оларды әлеуметтік желіде танымал актерлер жарнамалап жүр. Бірақ, шын мәнінде, мұндай үйірмелердің жұмысына қатысты тұрғындар көп сын пікір айтып жатыр.
Алматылық Ұлпан Қуанышбайдың 15 жасар қызы актриса болуды армандайды. Жақында белгілі актер Жан Байжанбаевтың қатысуымен шағын фильмге кастинг жарияланғанын көрген. Жобаға қатысу үшін жасөспірім іріктеу кезеңіне анасын бірге ертіп апарады. Киностудиядағы менеджерлер «Қызыңыз басты рөлді сомдайды, жабық көрсетілімде лимузинмен келіп, голливуд жұлдызындай қызыл кілемнен жүреді», — деп айтқан. Бірақ, тегін емес. Бағасы – 1,5 млн теңге. Кастингке баласын әкелген ата ананың көңіліне бірден күдік ұялаған.

Дәл осындай кастингтерді танымал актер Жан Байжанбаев пен Берік Айтжанов жарнамалған. Олардың менеджерімен телефон арқылы байланыстық.
ЖАН БАЙЖАНБАЕВ ПЕН БЕРІК АЙТЖАНОВТЫҢ МЕНЕДЖЕРІ:
— Бұл студия Жан Байжанбаев пен Берік Айтжановты актер ретінде шақырды. Олардың қатысуымен шағын фильмдердің барлығы түсірілді. Біз өз тарапымыздан міндетімізді толық орындадық. Қазір бұл жобаға қатысып жатқан жоқпыз.
Танымал актерлердің жарнамасына сеніп, жекеменшік киностудияға баласын апарған ата-аналар аз емес. Бұл мәселе қазір желіде қызу талқыланып жатыр. Жұрт наразылығын білдіруде.
ИНАРА БАРСАҚБАЕВА, ТІЛШІ:
— Танымал актерлермен киноға түсуге кастинг жариялаған үйірме осы. Киностудияның көздегені не? Балалардың шығармашылық шеберлігін шыңдау ма, өнерін дамыту ма әлде ақша бопсалау ма? Бүгін осы сұрақтың жауабын білу үшін мекемеге келдік. Бірақ киностудия басшылығы орнында болмады.

Киностудия басшылығы кейін телефон арқылы да жауап беруден бас тартты. Жалпы, балаларды кастингке шақырып жатқан жекеменшік үйірмелердің жұмысынан кино саласының мамандары да хабардар.
ЕРЛАН НҰРМҰХАМБЕТОВ, КИНОРЕЖИССЕР:
— Келе салып 1,5 млн теңге беру қауіпті. Бірінші ата-аналар өздері қадағалау керек. Мұндай ақшаны ешкім бере салмайды ғой.
Иә, әдетте киноға түскені үшін актерге ақша төлейтін еді. Бірақ керісінше емес. Көптеген ата-ана балаларының жұлдыз болғанын қалайды. Сондықтан түрлі кастингтерге сенеді, ақшасын да төлейді. Кино мамандарының пікірінше, осындай кастинтерді жарнамалап жүрген қазақстандық актерлерге де қоғам адындағы жауапкершілігін арттырған абзал.
———————————————