Сиыр етінің бағасы жылқыныкінен асып түсті

Ет нарығында болмаған жағдай. Сиыр етінің бағасы жылқыныкінен асып түсті. Ірі қара мал еті базарда 3 500 теңгеден сатылса, дүкенде келісі 5 мың теңгеге жеткен. Бағаның былай шарықтауына не себеп? Қай өңірде ет қымбат?
Қазақстандықтар соңғы айларда сиыр еті қымбаттап кеткенін айтып, дабыл қағуда. Ақтөбенің базарында бір келі ет 3500-ден сатылса, Шығыс Қазақстанда – 3700, Алматыда – 4 500-5000, кей жерде тіпті 6000 теңгеге жеткен. Шымкент базарында сиыр еті 4 мың теңгеден түспей тұр.

МӘРИЯМ АСАНОВА – САУДАГЕР:
— Жылқының еті сүйегімен 3500-3700 теңгеден болмаған еді. Қазір сондай баға болып жатыр. Сиыр еті – 3800-3900 тг, сүйегімен 4 мыңнан болып жатыр. Қой да 4 мыңнан. Бірақ мұндай болмаған. Әдетте 100-200 теңге айырмасы болатын. Қайтадан қалпына түсетін шығар. Бірақ екі айға жақындады, баға түскен жоқ.

Астанада да ет бағасы өскен. Біз барған коммуналдық базарда сиыр еті – 3 350, жылқы еті – 3200, қой еті 3500 теңгеден сатылып жатыр.

Саудагерлер: «Қазір сатарға ет табу қиын» дейді. Өйткені елдегі бар ет экспортқа кетіп жатқан көрінеді.

ЖӘМИЛӘ ҚАЛДЫБЕКОВА – САУДАГЕР:
— Қазір шекараны ашып тастаған. Етті Өзбекстан, Қырғызстан әкетіп жатыр дейді. Сол үшін ет қымбаттады деп ойлаймын.

АЛТЫНАЙ НАРМАНОВА – САУДАГЕР:
— Сиыр еті қымбаттаған соң, жылқы еті өтіп жатыр, ол рас. Тойға да жылқы етін алады. Қазір күнделікті тамаққа да, фаршқа да осы жылқы етін қолданататын болдық.
Етті өз дүкенінде сататындарды да нарықтағы жағдай есеңгіретіп отыр. Ерназ Аманбайдың айтуынша, мал бордақылайтын алаңдардың өзінде сиыр еті қымбат. Келісі – 3300-3500 теңге.

ЕРНАЗ АМАНБАЙ – САУДАГЕР:
— Ет ауылда қымбат. Ауылда ет жоқ. Қазақстанда ет таусылды. Шетелге еттің бәрін экспорттап жатыр да, өзімізде ет қалмай жатыр. Ауылда ет жоқ, тірідей бәрін алып кеткен. Енді соятын мал жоқ.
Қазақстан ет одағының төрағасы ет бағасының күрт қымбаттауына соңғы бес жылда елдегі ірі қара мал санының азаюы себеп болды дейді.

МАҚСҰТ БАҚТЫБАЕВ – ҚАЗАҚСТАН ЕТ ОДАҒЫНЫҢ ТӨРАҒАСЫ:
— 4-5 жылдың ішінде ірі қара саны шамамен 2 миллион басқа азайды. Өткен қыста және жыл басында ет сатып алушылардың алдында мал мүлдем жоқ немесе өте аз деген проблема тұрды. Содан баға бірден көтеріле бастады. Көтерме баға бірден 50%-ға өсті. Қазір сиыр етінің бағасы килограмына 3500-4000 теңге аралығында. Бұл үрдіс мал басы қалпына келгенше, яғни тағы 3-4 жылға дейін жалғасады.

ГҮЛВИРА СЕЙТЕН – ТІЛШІ:
— Қалай дегенмен базарда ет саудасы тоқтап тұрған жоқ. Бірақ халық бұрынғыдай қапшықтап немесе жіліктеп емес, етті 2-3 келіден ғана алып кетіп жатыр.
———————————————