СҚО-да 8 мектеп жұмысын тоқтатуы мүмкін

Солтүстік Қазақстан облысында жаңа оқу жылы қарсаңында 8 мектеп жұмысын тоқтатуы мүмкін. Білім басқармасы мамандарының айтуынша, бұған баланың аздығы себеп. Тіпті кейбірінде оқушы саны үшке де жетпей қалған. Айта кету керек, есігіне құлып ілінгелі тұрған білім ошақтарының барлығы ауылды жерде орналасқан. Оқушылар мен мұғалімдердің тағдыры не болмақ?
Аққайың ауданына қарасты Қанжығалы ауылында бұрын өмір қыз-қыз қайнап тұрды дегенге сену қиын. Күйі кеткен елді мекен облыс орталығынан небәрі 70 шақырымдай жерде орналасқан. Соңғы жылдары халық үдере көшті. «Қоныс аударудың себебі – жұмыссыздық», — дейді жергілікті тұрғындар. Салдарынан бастауыш мектептің есігіне құлып ілінді.

ГҮЛНӘР ЫБЫРАЕВА – АУЫЛ ТҰРҒЫНЫ:
— Өкінішті, қимаймыз мектеп жабылғаны үшін. Өзімнің екі балам да осы мектепте оқып, бітірді. Ауылдан жастар көшкен соң, кісінің саны да азайып жатыр. Сол себептен бала жоқ. Бала болмаған соң, мектебіміз жабылып жатыр.

Енді жаңа оқу жылында балалар аудан орталығына қатынап оқиды. Ол үшін арнайы көлік бөлінеді. Жалпы Айыртау, Шал ақын, Тайынша және Аққайың ауданында жағдай қиын.

САЙРАМБЕК ЖАҚЫПОВ – АУДАНДЫҚ БІЛІМ БӨЛІМІНІҢ БАСШЫСЫ:
— Өткен оқу жылында барлығы үш оқушы болған, төртінші сыныпта оқыған. Биыл төртінші сынып бітіргеннен кейін, олар Смирнов мектеп иитернатында оқуын жалғастырады. Бұл ғимарат енді жоспарлап жатырмыз, негізі аудан әкімінің коммуналдық меншігіне аударылады.

Осыдан оншақты жыл бұрын өңірде 600-ге тарта білім ұясы болған. Бүгінде 444-ке кеміді. Ал оның 76 проценті шағын комплектілі. Яғни көбінде бала саны талапқа сай келмейді. Былтыр аймақта 12, биыл тағы 8 нысан жабылмақ.

ӘСЕЛ ОРАЗБАЕВА – БІЛІМ БАСҚАРМАСЫНЫҢ БАСПАСӨЗ ХАТШЫСЫ:
— Егер де балалардың саны артатын болса, яғни нормаға сай болатын болса мектептерді жабу мәселесі қайта қарастырылады. Мұғалімдер жұмыссыз қалмайды. Оларға таңдауы бойынша жұмыс орындары беріледі.

Ықшамдалған шағын мектептердің болашағы бұлыңғыр. Олар да келешекте жабылып тынуы мүмкін. Өйткені ауылдарда халық саны азаймаса, көбейер емес. Жалпы биылғы оқу жылында аймақта небәрі екі жаңа мектеп пайдалануға берілмек. Оның бірі Петропавл қаласында.
———————————————