Жүрекке ерекше операция. Астанадағы балалар кардиохирургия орталығында бірінші рет жүрек ақауына ота жасаудың жаңа тәсілі қолданыла бастады. Операцияны шетелден арнайы шақырылған Мельбурн Корольдігінің білікті хирургі Игорь Константинов жасап жатыр. Ол сондай-ақ қазақстандық әріптестерімен шеберлік сабақтарын өткізіп, тәжірибе алмасты.
АЙЗАТ ТҰРҒЫНБЕКҚЫЗЫ – ТІЛШІ:
— Дәл қазір балалар кардиохирургия бөлімшесінде австралиялық профессор, хирург 5 жасар баланың жүрегіне ота жасап жатыр. Бұндай операция біздің елімізде бұрын соңды жасалмаған. Оның ерекшелігі баланың жүрегіне синтетикалық заттардың орнына, өз тіні қолданылады.
Операцияға жатқызылған баланың жүрегінде туа біткен ақау бар. Қазақстанда дәл осындай отаға мұқтаж 3 мыңға жуық бала тіркелген. Бұған дейін, елімізде жаңа туған нәрестеден бастап, 18 жасқа дейінгі балаларға күрделі хирургиялық емдеу жолы қолданылған. Бірақ қажет жағдайда өз тінін өзіне, яғни етінен ет кесіп алып ағзаға пайдалану болып көрмепті.
АМАНГЕЛДІ КЕРІМҚҰЛОВ — БАЛАЛАР КАРДИОХИРУРГИЯ ОРТАЛЫҒЫНЫҢ ДИРЕКТОРЫ:
— Арнайы Австралия елінен профессор Игорь Константинов деген дәрігерді шақыртқанбыз. Шақырту себебіміз өзіміздің орталықта Қазақстанда жаңа операция түрін енгізіп жатырмыз. Ол сирек кездесетін жүрек ақауы – Эбштейн аномалиясына жасалады. Енді болашақта осы әдісті өзіміз одан сайын дамытамыз.
Шетелдік профессор екі аптада 15 баланың жүрегіне осындай операция жасалды. Кішкентай пациенттердің жағдайы біршама жақсарып та қалған.
БОТАГӨЗ ПІРМАШ — НАУҚАСТЫҢ АНАСЫ:
— Ота жасалды. Иә. Бірінші рет ашық түрде жасалды. Екінші рет жабық түрде жасалды. Бәрі сәтті өтті.
Орталық мамандары күрделі туа біткен жүрек ақауларын хирургиялық емдеудің соңғы тәсілдері мен озық әдістерін меңгеру үшін австралиялық хирургтан сабақ алып, тәжірибе алмасып жатыр. Сарапшылардың айтуынша, болашақта мұндай күрделі операция елімізде тұрақты түрде жасалса, жерлестеріміз де шетелге ат сабылтпайды.
———————————————
© 2009-, «Жетінші арна». Барлық құқықтар қорғалған.
