Елімізде киберспорт кеңінен танылып келеді. Салаға қызығушылық танытатындардың саны бүгінде 1,5 миллион адамға жуықтайды. Көбі Контр Страйк 2, Дота 2 мен ПАБ Мобайлды ойнайды. Сарапшылардың айтуынша, соңғы 10 жылда қазақстандық геймерлердің арасынан бірнеше долларлық миллионер шыққан. Бірақ бір мәселе бар. Дені өзге елдің атынан өнер көрсетеді. Сонда бізде қажет инфрақұрылым жоқ па?
Компьютерлік ойын біреуге ермек болса, енді біріне кәдімгі табыс көзі. Мәселен, халықаралық додаларға бақ сынайтын ойыншылар қомақты жалақы алады. Мөлшері 5 мыңнан 50 мың долларға дейін жетеді. Бұл турнирден алатын сыйақы мен демеушілік келісімдерді қоспағанда.
Бүгінде киберспорт — қарқынды дамып жатқан индустрия. Турнирлер де, командалар да, ұйымдар да бар. Сол үшін кәсіби спортшы үшін тек талант емес, темірдей тәртіп пен төзімділік қажет. Counter-Strike ойыны бойынша кәсіби ойыншысы Абай Хасеновтің айтуынша, қазақстанда бұл саланың дамуы үшін барлық жағдай бар. Тек әрекет етсе жеткілікті.
АБАЙ ХАСЕНОВ — КӘСІБИ КИБЕРСПОРТШЫ:
— Түрлі кедергі болуы мүмкін. Себебі әр киберспортшының немесе ұйымның өз мақсаты мен міндеті болады. Дегенмен, айта кетерлік бір жайт, бұл салада менеджмент жеткілікті деңгейде дамымаған. Ал ол – ірі турнирлерді ұйымдастырудың, демеушілердің тартудың қозғаушы күші.
Қазақстанда киберспорт 2018 жылы ресми түрде спорт түрі ретінде тіркелді. Жеті жылда біздің спортшылар жаһандық жарыстарда 2 мәрте жеңімпаз атанды. Пабджи мобайл мен дота 2 ойындары бойынша күллі әлемді мойындатты. Бірақ жүйе мен инфрақұрылымның жоқтығынан олар елден кетуге мәжбүр.
———————————————
© 2009-, «Жетінші арна». Барлық құқықтар қорғалған.
