Соңғы кезде таксимен жүрудің өзі қауіпті болып барады. Әсіресе қыз балалар мен әйел адамдар үшін алаңдаушылық басым. Оларға такси жүргізушілері жиі тиісетінді шығарды. Бұған бір тоқтау бола ма? Такси қызметін ұсынатын компания өкілдері тәртіпті қадаңдатып жатқанын айтады. Бірақ сарапшылар бұл аз деп отыр. Жүргізуші мен жолушы арасында барынша байланыс болмауы шарт деп есептейді. Сонда қалай?
InDrive қосымшасы арқылы қызмет көрсеткен такси жүргізушісінің бұл азығындық әрекеті көпшіліктің жағасын ұстатты. Ер адам көлік жүргізіп келе жатып, артқы орындықта отырған 19 жастағы қыз бен оның анасының көзінше әурет жерін уқалаған. Тіпті қыздың аяғына қол жүгіртпек болған. Бойжеткен бәрін камераға түсіріп үлгерген. Кейін көліктен шығып, дереу полицияға арыз беріпті. Күдікті 15 тәулікке қамалды, оның әйелі мен баласы бар болып шықты.
Такси жүргізушілеріне шағым көп. Бірақ көбі полицияға арызданбайды. Тіпті ашық айтуға да арланады. Заңгерлердің айтуынша, мұндай жағдайға қатысты заңнамада жеке бап қарастырылмаған. Көп жағдайда «ұсақ бұзақылық» немесе «қоғамдық орындарда тиісу» бабы бойынша жауапкершілік бар. Кей кезде жәбірленуші кінәлі болып қалуы да мүмкін. Мәселен, жақында Астанада осындай жағдайға тап болған қыз балаға тәртіп сақшылары қысқа киім кимеуге кеңес берген.
САЛТАНАТ ӘЗІРБЕК – ПД ӨКІЛІ:
— Такси жүргізушісін тауып, анықтау қиын емес. Дегенмен құқықтық жағдайға баға беру үшін мұны жедел орындау маңызды. Мән-жәйді объективті бағалау керек. Әр дерек жеке тексеріледі. Әрине, жыныстық қысымға ұшыраған жағдайда өтініш жазу керек. Қылмыскер жазасыз қалмауы қажет.
Астанадағы InDrive жүргізушісімен болған жанжалдан кейін такси қызметтері қатаң шаралар қабылдауды қолға алды. Компания басшысының сөзіне сенсек, енді көлік ішінде жолаушылармен танысуға да тыйым салынбақшы. Ал сарапшы Арсен Шакуов такси қызметі мемлекет бақылауында болуы керек деп санайды.
АРСЕН ШАКУОВ, «ОРТАҚ ЖОЛ» ҚАУЫМДАСТЫҒЫНЫҢ ПРЕЗИДЕНТІ:
— Біз, әрине, жеке бизнесті дамытуға мүдделіміз. Бірақ, егер аталған сектор азаматтардың денсаулығына зиян тигізетін болса, бұл мәселені әкімшілік тұрғыда шешкен дұрыс. Батыс елдерінде таксилерге шыныдан перде орнатылған. Бұл жүргізуші мен жолаушы қауіпсіздігі үшін қажет. Бізге де осы тәжірибені негізге алған жөн.
«Қалай болған күнде де көпшілікке қызмет көрсететін көлік жүргізушілері мұқият тексерілуі керек», — дейді сарапшылар. Бірақ дәл қазір бұл мүмкін емес. Өйткені жеке көлігі бар кез келген азаматтың такси жүргізушісі болуы оп-оңай. Арнайы қосымшаны жүктеп, көлігі мен куәлігін тіркесе болғаны.
ИНАРА БАРСАҚБАЕВА – ТІЛШІ:
— Ендеше таксиге отырған кезде нені ескеру керек? Мамандардың кеңесіне құлақ түрейік. Әуелі артқы орындыққа отыруға тырысыңыз. Такси жүргізушісін барынша әңгімеге тартпаңыз. Міндетті түрде көліктің мемлекеттік нөмірін жазып, жақындарыңызға жіберіңіз. Телефоныңызда геолокацияны қосып, достарыңызға соңғы баратын мекенжайыңызды айтыңыз. Егер көлік жүргізушісі тарапынан орынсыз, оғаш әрекетті байқасаңыз, дереу полицияға хабарлаңыз.
———————————————
© 2009-, «Жетінші арна». Барлық құқықтар қорғалған.
