Қонаев жағажайындағы дау: кәсіпкерлер мен әкімдік мәмілеге келді

Қонаевтағы жағажайларға қызмет көрсететін кәсіпкерлер қудалауға ұшырап жатқанын айтады. «Жергілікті биліктің масқаты – маусымдық жұмыстан айырып, нәпақадан қағу», — дейді. Биыл Қапшағай жағалауында 1,5 млн адам демалған. Сонда бизнеске талас болып жатыр ма? Бүгін бұл мәселені әкімдік, мәжіліс депуттары және кәсіпкерлер бірге отырып талқылады.
Қонаев қаласындағы №6 жағажайда жазғы шомылу маусымы кезінде демалушыларға 42 кәсіпкер қызмет көрсетеді. Қалалық әкімдік өкілдері ертеректе оларға алдағы күзден бастап жағалауды жалға алу келісімшарты бұзылатынын ескерткен. Осыдан кейін кәсіпкерлерден маза қашқан.

ҚАМБАР БАЕКЕНОВ – КӘСІПКЕР:
— Біз төрт жыл бойы ұзақ мерзімге жалға беру мәселесін көтеріп жатырмыз. Кәсіпкерлер соны ұсынып жатыр. Бізді әлі күнге дейін естімей жатыр. Үш айға беріледі. Үш айдың ішінде жаңағы кәсіпкер не істейді?

ТӨЛЕГЕН КЕНЖЕБЕКОВ – ҚАЛА ӘКІМІНІҢ ОРЫНБАСАРЫ:
— Өздеріңізге мәлім, біз мұны үнемі айтып жүрміз. Қазіргі заман талабының кейбір критериилеріне сәйкес келмейді. Осы мақсатта қалалық әкімдіктің тарапынан №6 қалалық жағажайды реконструкциялау жұмыстары басталды. Жоба жасалып жатыр. Жоба аяқталғаннан кейін бұл жерде құрылыс жұмыстары жүргізілетін болады.

Жергілікті атқарушы билік өкілдерінің айтуынша, №6 қалалық жағажайды абаттандыруға жергілікті бюджеттен 1 млрд-тан астам теңге бөлінеді. Өйткені демалыс орнының қазіргі кейпі заман талабына сай емес. Оры орайда Мәжіліс депутаттары Қапшағай су қоймасына барып, бұған бірнеше мәрте көз жеткізген болатын.

НАУРЫЗ САЙЛАУБАЙ – МӘЖІЛІС ДЕПУТАТЫ:
— Жағажайда осы жылдың күз айынан бастап келесі жылдың көктеміне дейін құрылыс жұмыстары жүргізіледі. Әкімнің айтуы бойынша, абаттандырудан кейін жағажайда тұрған кәсіпкерлерге ұзақ мерзімге беріледі.
ДАСТАН ҚҰСАЙЫНОВ – КӘСІПКЕР:
— Егер абаттандырудан соң бізге өз орнымызды 5 жылға берсе, жақсы болар еді. Ал егер өздерің салыңдар десе, біз өзіміз салуға дайынбыз. Үш айлық мерзімге ғана бергеннен кейін ешкім салғысы келмейді, қаражат жұмсағысы келмейді.

Төрт жылға созылған даулы мәселеге бүгін нүкте қойылғандай. Кәсіпкерлер шомылу маусымы аяқталысымен туристерді қабылдауға арналған мүліктерін жағажайдан алып кетеді. Ал қалалық әкімдік абаттандыру жұмыстарын жүргізіп, келер жылы шомылу маусымы қарсаңында кәсіпкерлермен 5 жылға келісім жасауға уағдаласты.
———————————————