Ақтөбеде киік етіне сұраныс жоғары. Ол өңірге көршілес Батыс Қазақстан облысынан тек осы айдан бастап жеткізіле бастады. Қала тұрғындары осы аралықта 11 тоннадан астам етті сатып алып үлгерген. Жұрт киік етін пайдалы деп қана емес, бағасына бола қызығып отыр. Бір келісі – 1800 теңге.
Ақтөбедегі бұл базарда киік еті ұзақ жатпайды. Екі күнде тұрғындар шамамен 4 тоннасын сатып алған. Ет бөлшектелмей тұтастай сатылады, бірақ жұрт оның да амалын тапқан. Бірігіп сатып алып, сол жерде бөліп алады. Бағаның төмен болғаны – бұған басты себеп: келісі 1800 теңге, бұл басқа ет түрлерінен екі есе арзан.
ШӘРБАТ СӘРСЕНБАЕВА, ҚАЛА ТҰРҒЫНЫ:
— Ауылда үнемі киіктің етін қуырдық қылып жейтінбіз. Асып жегенін көрген жоқпын, бірақ қуырдақ қылып жедік. Бағасы қалта көтереді. Күнделікті қуыруға, қуырдаққа пайдалы. Сол үшін келіп тұрмын.
Ақтөбеге киік еті осы ай басталғалы Батыс Қазақстан облысынан жеткізіліп жатыр. Өнім ветеринарлық-санитарлық сараптамадан өткеннен кейін ғана сатылымға жіберіледі. Сапасын облыстық ветеринарлық инспекция бақылайды. «Базарға түскен соң да ет қайта тексеруден өтеді», — дейді базар өкілдері.
ГҮЛАЙЫМ ТҰЯҚОВА — БАЗАРДЫҢ БӨЛІМ МЕҢГЕРУШІСІ:
— Ет екі күн ішінде өтіп кетеді. Көбіне 3-4 тоннадай сатылады. Бізге Оралдан келеді. Ол жақта қасапханада сойылып, міндетті түрде тексеріледі. Сатуға рұқсат қағазымен келеді. Мұнда да қайта тексереміз, пісіріп көреміз, трихинеллёзге зерттейміз.
ГҮЛНАР ТІЛЕУ — БАЗАР ӘКІМШІСІ:
— Екі күннен бері бізге сайғақ еті келіп жатыр. Бас дәрігеріміз айтқандай, бүкіл құжатымен, сапасы тексерілген. Өтіп жатыр. Халыққа тиімді. Келісі – 1800 тг. 2 күннен бері 3 тоннадай сатылды. Алдағы уақытта тағы да кіргіземіз деп ойлаймыз.
Қазір Ақтөбе облысында шамамен 450 мың киік бар. Алайда бұл өңірде ақбөкен атуға тыйым салынған, сондықтан ет тек Батыс Қазақстан облысынан жеткізіледі.
———————————————
© 2009-, «Жетінші арна». Барлық құқықтар қорғалған.
