«Кадзики» тайфуны Тайландты тас-талқан етті

«КАДЗИКИ» ТАЙФУНЫ
«Кадзики» тайфуны енді Тайландты тас-талқан етті. 13 тұрғын жарақат алған. Тағы 5 адам із-түзсіз жоғалған. 200 үй қирап, электр желілері үзілді. Қазір кей өңірде жарық жоқ. Жергілікті билік келесі айдан бастап үйлерді қалпына келтіріп, зардап шеккендерге өтемақы төлеуге уәде берді.

ДҮЛЕЙ ДАУЫЛ САЛДАРЫ
«Кадзики» бұған дейін Вьетнамға да соққан еді. Соның салдарынан 7 адам опат болды. Біреуі жоғалып кетті. Тағы 34 тұрғын жарақат алды. Бұдан бөлек, 15 қирап, 8700-і бүлінді. 63 мектеп пен 8 ауруханаға зақым келді. Қазір аймақта қалпына келтіру жұмыстары жүріп жатыр. Электр желілері мен жолдар жөнделуде.

ТАСҚЫННАН 34 АДАМ ОПАТ БОЛДЫ
Ал Үндістанның Джамму және Кашмир аймағында да төпелеп жауған жаңбырдан сел жүріп, лай көшті. 34 адам опат болды. Тағы ондаған тұрғын із-түзсіз жоғалып кетті. Мыңдаған адам қауіпсіз жерлерге көшірілді. Апат аймағында білім беру мекемелері түгел жабылды. Бұған дейін су тасқыны 70-ке жуық адамның өмірін қиған еді. Синоптиктер жауын әлі де жалғасатынын ескертіп отыр.

100-ДЕН АСТАМ ҮЙДІ СУ БАСТЫ
Ресейде де төпелеп жауған жаңбырдан 100-ден астам үй су астында қалды. Табиғаттың тосын мінезіне байланысты бірқатар өңірде тұрғындар жаппай эвакуациялана бастады. Ханты-Мансийск, Хабаровск, Сахалин өлкелерінде төтенше жағдай қызметкерлері күн-түн демей жұмыс істеп жатыр.
———————————————