Орманшылар әулеті: Алматы облысында кәсіп атадан балаға жалғасып келеді

Алматы облысында орманшылық кәсіпті атадан балаға жалғаған әулет аз емес. Солардың бірқатары «Кеген орман шаруашылығы» мекемесінде еңбек етеді. Мамандыққа адал болуды алға мақсат етіп қойған жандар орманды қорғап, молықтыру жұмыстарына үлкен жауапкершілікпен қарайды. Себебі орманшы болу оңай шаруа емес. Ол асқан шыдамдылықты қажет ететін мамандық.
Берік Шарғынов пен Ринат Алпысбаев ұзақ жылдар бойы «Кеген орман шаруашылығы» мекемесінде жұмыс істеп келеді. Қазір бірі – «Темірлік», екіншісі – «Қарқара» орманшылығында қызметте жүр. Аталған орманшылар әулетінің жалпы еңбек өтілін санасаңыз, 150 жылға жуықтайды екен. Ата-бабалары орманшы болғандықтан, өздері де бала күннен осы мамандықтың иесі атануды армандаған.

РИНАТ АЛПЫСБАЕВ – ОРМАНШЫ:
— Орманды таза ұстап, от жақпау керегін ескертіп, бәрін өзіміз қадағалап жүреміз. Атамыздың, әкеміздің ізін жалғастырып келе жатырмыз. Өзіме орман шаруашылығы ұнайды.

БЕРІК ШАРҒЫНОВ – ОРМАНШЫ:
— Әкеміз «Кеген» орманшылығында 40 жыл жұмыс істеген. 1972 жылы жұмысқа кіріп, 2012 жылы зейнетке шығып, денсаулығына байланысты о дүниелік болып кетті. Содан енді әке жолын қуу деген мақсатымыз бар. Өзімізге табиғатта жүру ұнайды.

Оларға жүктелген міндет – өрт қауіпсіздігін қатаң сақтау, орманды молықтыру және аң-құстарды қадағалау. Екі азамат та қазір жергілікті колледждердің бірінде жастарға орманшылықтың қыр-сырын үйретіп жүр. Өз ісіне асқан жауапкершілікпен қарайтын мамандардың еңбегі басшылық тарапынан әркез жоғары бағаланады.

АЙБОЛАТ СҰЛТАНҒАЗИЕВ – «КЕГЕН ОРМАН ШАРУАШЫЛЫҒЫ» МЕКЕМЕСІНІҢ ДИРЕКТОРЫ:
— Династияның бір жақсы жері адам жанашырлықпен қарайды. Өйткені «Ұяда не көрсең, ұшқанда соны ілесің» деп, туғаннан көріп өскеніміз осы орман ғой. Мысалы, біз осы саладан кеткіміз келмейді.

«Кеген орман шаруашылығы» мекемесінде жүзден астам адам еңбек етеді. Соңғы кездері онда жұмысқа орналасқысы келетін жастардың қатары артқан. «Бұған материалдық-техникалық базамыздың жақсаруы мен жалақымыздың өсуі оң әсер етті», — дейді мамандар.
———————————————