Жаңа оқу жылы жаңа мектепте. Астанада «Келешек мектептері» ұлттық жобасы аясында биыл жеті мектеп жаңа келбетке енді. Оның алтауы бірінші қыркүйекте пайдалануға берілмек. Тағы бір мектеп жылдың аяғында тапсырылады. Жалпы, алдағы үш жылда Астанада 22 білім ошағы түгел жаңартылады. «Бұл үш ауысымдық мектептер мәселесін шешуге септігін тигізеді», — дейді мамандар.
Бұл – Талғат Бегильдинов атындағы №1 мектеп-лицейі. 60 жылдық тарихы бар білім ошағы адам танымастай өзгерген. Оқу кабинеттері, жиһаздар, еден мен шатырына дейін түгел жаңартылған. Астана қаласының тұрғыны Мәдина Хасенованың баласы биыл осы білім ошағының табалдырығын аттайды.
МӘДИНА ХАСЕНОВА — ҚАЛА ТҰРҒЫНЫ:
— Осы мектепке бергеніме өте қуаныштымын. Өйткені биыл күрделі жөндеуден өтті. Заманауи технологиялармен, құрал-жабдықтармен қамтамасыз етілген. Әр дәліз, кабинеттер заманға сай безендірілген. Балалардың оқуға деген ынтасы артады деп ойлаймын.
АНЖЕЛИКА КОТВИЦКАЯ — ҚАЛА ТҰРҒЫНЫ:
— Мектебіміз жөнделіп, заманауи білім беру нысанына айналды. Ғимараттың іші өте жайлы әрі жарық. Менің екі қызым да осы мектепте оқиды. Маған да, балаларыма да қатты ұнап жатыр.
ИНАРА БАРСАҚБАЕВА – ТІЛШІ:
— Биылғы оқу жылында бұл білім ошағы жасанды интеллект технологияларының озық үлгілерін енгізуге басымдық беруде. Киберкласс кабинетінде қуаттылығы жоғары заманауи компьютерлер орнатылған. Мұнда шәкірттер кибер қауіпсіздік бойынша білімдерін шыңдайтын болады. Балалар жан-жақты ақпараттық технологиялардың мүмкіндігімен танысады. Оқушыларға сабақ беру үшін ұстаздар да арнайы даярлық курстарынан өткен.
Мектепте 2400 шәкірт білім алады. Мүмкіндігі шектеулі балаларға арналған инклюизвті кабинет те ашылған. Мұнда бар жағдай жасалған. Кітапхана мен спорт залдары, асхана соңғы үлгіге сай жабдықталған.
МАХАББАТ РЫСМҰХАМБЕТОВА — МЕКТЕП ДИРЕКТОРЫ:
— Осыдан 3 жыл бұрын тек орыс тілді меткеп болған. Жаңа оқу жылында қазақ тілінде білім беретін бастауыш сыныптар ашылды.
1 қыркүйекте Астана қаласында тағы осындай 5 мектеп ел игілігіне беріледі. Тағы бір білім ошағы жылдың аяғында тапсырылады. Жалпы елордада алдағы үш жылда «Келешек мектептері» ұлттық жобасы аясында 22 білім ордасы жөнделіп, жаңа келбетке енеді. Білім Басқармасының мәліметінше, бұл үш ауысымдық мектептер мәселесін шешуге оң ықпал етпек.
АЯЖАН АМАНТАЙҚЫЗЫ – БІЛІМ БАСҚАРМАСЫНЫҢ БАСПАСӨЗ ХАТШЫСЫ:
— Балалар 100 пайыз оқулықпен қамтылды. Бүгінгі таңда мектептердің 80 пайызына оқулықтар таратылды. Бастауыш сыныптар тегін тамақтанады. Әлеуметтік осал топтағы отбасылардың балалары да тегін ыстық тамақпен қамтамасыз етіледі. Биыл ас мәзірі жаңартылды.
Балалар қауіпсіздігін қамту мәселесіне де жіті көңіл бөлінген. Биыл 100 мектепке 2 мың бейнебақылау камерасы орнатылды. 100-ден аса білім ошағы Face ID жүйесімен жабдықталды. Сала мамандары елордалық мектептер жаңа оқу жылына тас түйін дайын екенін айтады.
———————————————
© 2009-, «Жетінші арна». Барлық құқықтар қорғалған.
