Алматы облысындағы Көлсай көлдеріне келетін туристердің саны өткен жылмен салыстырғанда екі есе артты. Биыл онда 460 мыңдай саяхатшы ат басын тіреген. Соның үштен бір бөлігі – шетелдік азаматтар. «Көлсай көлдері» мемлекеттік ұлттық табиғи паркіне Үндістан, Біріккен Араб Әмірліктері мен Ресей, Қытай Халық Республикасынан саяхатшылар жиі барады.
«Көлсай көлдері» мемлекеттік ұлттық табиғи паркіне келген туристердің саны биыл 460 мыңға жуықтады. Демалушылардың үштен бір бөлігі шетел азаматтары екенін айта кетейік. Мұнда әсіресе Үндістан, Парсы шығанағы елдері мен ресейлік турист көп.
МЕРТ ФУРКАН, ТУРИСТ /ТҮРКИЯ/:
— Өте әдемі, маған қатты ұнады. Бізде де осындай жер бар, ол Ұзынкөл деп аталады. Бірақ мұндағы табиғат өте ерекше екен: жасыл желегі, мөлдір таза суы ұнады. Біздің арғы ата-бабаларымыздың қазіргі Түркия жеріне осы өңірден қоныс аударғанын білесіздер. Сондықтан бауырлас түркі халықтары мен барша шетелдік азаматтарға Көлсайды көруге кеңес беремін.
АЛИ АЛЬШАХИ – ТУРИСТ /БАӘ/:
— Қазақстанға алғаш рет келіп тұрмын. Өзім Араб Әмірліктерінің азаматымын. Қазір мекенім – Алмания жері. Осында отбасымызбен демалып жатырмыз. Бағасы аса қымбат емес сияқты. Қауіпсіздікке айрықша мән беріледі екен.
Табиғи паркте он шақты туристік бағыт бар. Демалушылар негізінен төменгі Көлсай мен Қайыңдыға барғанды ұнатады. ЮНЕСКО-ның бүкіләлемдік биосфералық резерваттар жүйесіне енген ұлттық парктің аумағын абаттандыруға биыл 68 млн теңге бөлінді. Оған пирс пен жаяу жүргіншілер жолы жөнделіп жатыр.
РУСЛАН ИМАНБАЙ, «КӨЛСАЙ КӨЛДЕРІ» МҰТП БӨЛІМ БАСШЫСЫ:
— Төменгі Көлсай мен жоғарғы Көлсайға жаяу жүргіншілерге арналған жолды жасау бойынша30 миллион қаражат бөлінген. Төменгі Көлсайға түсуге 26 миллион теңге қаражат бөлініп отыр. Осы жылдың аяғына дейін жасаймыз.
Көлсайға жыл аяқталғанша 500 мыңға жуық турист келеді деген болжам бар. Экологиялық тепе-теңдікті сақтау және орманды қалпына келтіру мақсатында көктемде тау бөктеріне 100 мың түптей Шренка шыршасы егілген.
———————————————
© 2009-, «Жетінші арна». Барлық құқықтар қорғалған.
