Конституция құрдасы: арманы орындалған әскери ұшқыш

Қазақстан Конституциясына – 30 жыл. Бұл – ел тәуелсіздігі тарихындағы маңызды белес. Ата заңмен түйдей құрдас, басты құжатқа бағынып, ондағы ережелерді бұлжытпай орындап жүрген азаматтың өмір жолына үңіліп көрмекпіз.
СЫРНАЙ ЖАНАТХАН – ТІЛШІ:
— Дәл қазір біз Қазақстан Республикасы Конституциясы құрдасымен таныс боламыз. Кезінде осындай ұшақтарға тек арманмен қараған ол бүгін әуеде Ұлттық ұланда осы ұшақты тізгіндеп елге кызмет етіп жүр.

Дидар Абдрахман – ұшқыш, капитан әрі авиациялық отрядтың кеме командирі. Краснодар жоғары әскери авиациялық училищесін алтын медальмен тәмамдаған. 2018 жылдан бері Y8 ұшағын тізгіндейді. Жезтұмсық қыранға алғаш рет 10-сыныпта оқып жүргенде отырыпты. Дәл сол сәттен бастап ол ендігі өмірін көк жүзімен байланыстыруға бел буған.

ДИДАР АБДРАХМАНОВ, АЭАЖ КЕМЕ КОМАНДИРІ:
— Ең алдымен, бұл – еркіндіктің белгісі. Себебі сен жерде емес, көктесің. Тынысың ашылғандай әсер болады. Өте керемет сезім. Алғаш рет отырғанымда жанымдағы нұсқаушы: «Қиялдамай жинал», — деп ескертті. Техникаға тиянақты қарауды үйретті.

Былтыр ел аумағында алапат су тасқыны болған кезде қырағы ұшқыш қиянда қалып қойған тұрғындарды құтқару ісіне атсалысқан. Есірткіге қарсы арнайы операцияға да қатысқан. Ең ұзақ сапары – Сирия мен Түркияға гуманитарлық жүк жеткізу болыпты. Жалпы әскери ұшқыш болу аса жауапкершілікті талап етеді. Табандылық пен тәжірибе қажет. Ал біздің кейіпкеріміз – осы үдеден шығып жүрген білікті маман.

ДАНИЯР ДОБРАШЕВ – АВИАЦИЯЛЫҚ ЭСКАДРИЛЬЯ КОМАНДИРІ:
— Ұлттық ұлан авиациясы ұшақпен толық қамтылған. Біз жылына екі маманды оқуға жібереміз. Солардың бірі – Конститутция құрдасы капитан Дидар Абдрахманов. Әуе командирі жұмысына тиянықты, жауапкершілігі жоғары маман.

Дәл осы Дидар Абдрахмановтан үлгі алып, ұшқыштың ізін басып келе жатқан жас маман көп. Мысалы, Әділет Ғалымжанұлының тәжірибеден өтіп жүргеніне бір жыл болған. Алты айдан бері ұшақ тізгіндеуге көшкен.

Иә, елімізде әскери ұшқыш болуды армандайтын жастар баршылық. «Олардың қатары жыл сайын артып келеді», — дейді Ұлттық ұлан өкілдері. Ал Дидар Абдрахманов секілді мамандығын шын сүйетін және қызметіне адал ұшқыш – бүгінгі әуе қорғанысының кепілі.
———————————————