Биыл – Жұмысшы жылы. Елене бермейтін еңбектің ерлері – қарапайым жандар жайлы көп айтыла бермейтіні де рас. Біз ел экономикасының бір бөлшегіне айналған осынау адамдар туралы тағы да айтсақ дейміз. Ол — кенші. 20 жылдан бері жер қойнауының қыр-сырын меңгерген, кәсіби маман, бұрғылаушы — Думан Майғараев. Сәтпаев қаласындағы кеніште жұмысының ауырлығына қарамастан, талмай тырбанып келе жатқан ол өз жұмысын жан тәнімен жақсы көреді.
Думан Майғараев – жай ғана кеніштегі бұрғылаушы емес. Ол шахтаны он саусағындай білетін маман. Жиырма жыл бойы жер астына түсіп, күрделі бұрғылау техникасын басқарып келеді. Ол – өндірістің жаңа белесіне жол ашып жүрген жан. Басқалар күмәнданатын жерде нақты не істеу керегін біледі.
ДУМАН МАЙҒАРАЕВ, КЕНШІ:
— Менің жұмысым – бұрғылау. Шахтаға келгеннен кейін медициналық тексерістен өтіп, шахтаға түсеміз. Бұл – өте қауіпті жұмыс.
Өндірісте Думан Майғараевты тек тәжірибесі үшін ғана емес, сабырлы мінезі, нақтылығы мен сенімділігі үшін де бағалайды. Ол әрқашан әріптесімен бірлесіп жұмыс істейді.
ТҰРСЫНБЕК МАҚЫШЕВ, КЕНІШ БРИГАДИРІ:
— Майғараев Думан Нысанбайұлы – менің өкше басып келе жатқан інім. Ұжымдағы ең жылдам ұңғылаушы, артық қимылы жоқ, артық сөзі жоқ. Мақтайтын жігіттің біреуі.
«Әке көрген оқ жонар». Бүгінде Думан Майғараевтың ұлы маркшейдер, яғни жер асты мамандығы бойынша білім алып жатыр.
———————————————
© 2009-, «Жетінші арна». Барлық құқықтар қорғалған.
