Қостанайлық оқушылар бау-бақша, көкөніс өсірудің қыр-сырын меңгеруде. Жастарды еңбекке баулып, табиғитқа деген сүйіспеншілікті арттыру үшін қаладағы мектептердің бірінде арнайы концепция құрылды. Енді жастар 3 жыл бойы тұқым себу кезеңінен бастап, барлық процесті өз қолымен жасайды. Әрі айналаны көгалдандырады.
Оқушылар арасында экологиялық мәдениетті қалыптасыру үшін Қостанайдағы №19 мектеп жанынан бау-бақша ашылған. Балалар жаз бойы құлпынай, таңқурай секілді жеміс-жидек пен көкөністің түр-түрін өсіреді. Осылайша еңбек етуге дағдыланады.
МАКСИМ ЖЕТПІСБАЕВ – ОҚУШЫ:
— Біз көп нәрсе үйреніп, тәжірибе жинадық. Яғни өсімдіктер мен жемістерге күтім жасап, барлық процесті өз көзімізбен бақылаймыз. Міне қызанақ, қияр, баклажан өсіп шықты. Бірнеше күннен кейін оларды асқа пайдалануға болады.
ӘЛИЯ БАЛҒАБАЕВА – БИОЛОГИЯ ПӘНІНІҢ МҰҒАЛІМІ:
— Қала мектептерінде бұл істі мықтап қолға алу керек. Балалар жеміс-жидекті суарып, арамшөптерін жұлады. Жерді қопсытады. Осылайша еңбектің қадірін түсініп, экологиялық мәдениетке бейімделеді.
Аталған білім ұясының өзге мектептерден ерекшелігі көп. Мұнда өскелең ұрпақты ерте жастан еңбекке және қоршаған ортаға баулиды. Ол үшін 3 жылға арнайы концепция құрылған. Басты мақсат – балаларға жайлы әрі қызықты орта қалыптастырып, экологиялық саналы жаңа буын тәрбиелеу.
АНАР ҚАБДУЛИНОВА – МЕКТЕП ДИРЕКТОРЫ:
— Мұның барлығы балалар үшін жасалып жатыр. Бұл мақсатқа тиісті қаржы бөлінген. Бізге ата-аналардан тек қолдау керек. Мұнымен қоса тың идея болса жеткілікті.
Игі іске жұмылған ұстаздармен жастардың еңбекқорлығының нәтижесінде мектеп аумағы адам танымастай өзгерген. Орындықтар қойылып, айнала жаппай абаттандырылды. Тіпті қазақтың киіз үйі де тігіліп, ұлттық құндылықтар дәріптеледі. Ал болашақта амфитеатр мен ландшафт аймағының жобасы қолға алынбақ.
———————————————
© 2009-, «Жетінші арна». Барлық құқықтар қорғалған.
