Баспаналы боламыз деп барынан айырылды. Семейде қаржы пирамидасына сеніп, сан соғып қалғандардың қатары 140-тан асып кеткен. Жәбірленушілердің арасында бес баласымен далада қалғандар бар. 200 миллион теңгесін алаяқтардың қолына өз еркімен санап бергендер де бар. Келтірілген шығын 1 миллиард теңгеден асады. Іс- неге сотта тұралап қалды? Күдіктілердің арасында кімдер бар?
Бір жарым жылдан бері пәтер жалдап жүрген семейлік Гүлсая Дүйсекенова 2024 жылы қаржы пирамидасының құрбаны болғанын айтады. Оның сөзінше, танысы «ақша салсаң, бес балаңмен кең үйге кіресің» деп сендірген. Отбасы 15 миллион теңгені өз қолымен тапсырған. Алайда уәде орындалмаған. Қазір көпбалалы ана туыстарын паналап жүр.
ГҮЛСАЯ ДҮЙСЕКЕНОВА, ҚАЛА ТҰРҒЫНЫ:
– Таныс болғандықтан алданамыз деп ойлаған жоқпыз. Сөздің шындығы керек. Бес баламыздың, ерекше баламның бар екенін, отбасымыздың жағдайын біліп тұрып адам осындай істеп кетеді деп үш ұйықтасам түсіме кірмеген. Соттың әділ шешімі болады деген үміттеміз.
Ірі көлемде қаражат салғандардың қатарында көпбалалы әке де бар. Ол 200 миллион теңгеге жуық қаржысынан айырылғанын айтады.
Жәбірленушілердің айтуынша, қаржысынан айырылуды көтере алмағандар да бар. Көлік пен баспана алып, балаларға жарқын болашақ сыйлауды көздегендердің үміті ақталмады. Семей қаласының өзінде 141 адам жәбірленуші деп танылған.
СӘКЕН ҚОНДЫБАЕВ, ЭКОНОМИКАЛЫҚ ТЕКСЕРУ ДЕПАРТАМЕНТІ БАСШЫСЫНЫҢ ОРЫНБАСАРЫ:
– Қылмыстық іс бойынша бір миллиардтан асқан залал келтірілген болатын. Соның ішінде 222 миллион теңгеден астам ішінара залал өтелген. Қазіргі уақытта қылмыстық іс сот қарауында.
Іс бойынша алты адам күдікті ретінде танылған. Оларға Қазақстан Республикасы Қылмыстық кодексінің 217 және 262-баптары бойынша айып тағылған. Тергеу дерегінше, төлемдер бір салымшының қаражатын екіншісіне аудару арқылы жүргізілген.
Мамандар азаматтарды қаржы салу кезінде сақ болуға шақырады.
———————————————
#Жаңалықтар #жаңалықтар2026 #жаңалықтаржетіншіарна #Жетіншіарна #седьмойканал #7канал
© 2009-, «Жетінші арна». Барлық құқықтар қорғалған.
