Шымкентте ауыр жүк көліктеріне тексеру жүргізіп жатыр

Шымкентте жол қауіпсіздігіне бақылау күшейді. 11 жасар баланы ауыр жүк көлігі қағып, мерт қылған қайғылы жағдайдан кейін ауқымды рейд басталды. Тәртіп сақшылары қаладағы ауыр жүк көліктеріне тексеру жүргізіп жатыр. Сондай-ақ «Жолдағы балалар» шарасы аясында балалар мен ата-анаға түсіндіру жұмыстарын жүргізіп, жол қозғалысы ережесінің сақталуын ескертіп жатыр. Екі тәулік ішінде көлік жүргізушілері 270 әкімшілік құқық бұзған. 87 көлік айыптұрағына қойылды. Көлік жүргізушілерінің пікірінше, қауіпті жол-көлік оқиғаларының алдын алу үшін мұндай рейдттер жиі жүргізілуі керек.
БАБУР РАСУЛМАТОВ, ҚАЛА ТҰРҒЫНЫ:
— Рейдтік іс-шара жүргізіп жатқаны дұрыс болған. Жақында ғана үлкен машинаның балаларды қағып кеткенін естідік, көрдік.
АСЫЛЖАН ОЗҒАНБАЙ, ПАТРУЛЬДІК ПОЛИЦИЯ ПОЛКІНІҢ АҒА ИНСПЕКТОРЫ:
— Шымкент қаласында өтіп жатқан «Жолдағы балалар» жедел алдын алу профилактикалық іс-шарасының негізгі мақсаты – балалардың өмірі мен денсаулығын қорғау, олардың қатысуымен болатын жол-көлік оқиғаларының алдын алу және жол қозғалысы қауіпсіздігін қамтамасыз ету. Электрлі самокат, велосипед, мопед және өзге де жеке мобильділік құралдарын пайдаланушылар тарапынан болатын құқықбұзушылықтардың алдын алу бағытында рейдтік-профилактикалық шаралар ұйымдастырылуда.
———————————————

#Жаңалықтар #жаңалықтар2026 #жаңалықтаржетіншіарна #Жетіншіарна #седьмойканал #7канал