Арнаға тіркел / Подпишись на канал: http://www.youtube.com/@TheSevenNews
Қарағандыда қолөнер үйірмесі танымалдылыққа ие болып келеді. Мұнда он саусағынан өнер тамған шеберлермен бірге мектеп оқушылары да киізбен жұмыс істейді. Кезінде ата кәсібімізде тұтынған материалдардан қыздар сәндік бұйымдар, киім-кешек пен әшекейлер жасайды. Курс авторының айтуынша, уақыт өте келе бұл хобби оқушыларға табыс көзіне де айналуы мүмкін.
Бұл шеберханада тыныштықты тек жұмыс істеп тұрған тігін машинасының тықылы ғана бұзады. Мұнда дамытушы ойыншық, шығармашылыққа арналған жиынтық және киізден жасалған бұйым әзірленеді. Жобаның авторы әрі жетекшісі – кәсіпкер Дәмелі Ермекова. Бірнеше жыл бұрын ол мемлекеттен бес миллион теңге көлемінде грант алып, сол қаржыға заманауи құрал-жабдық сатып алған. Осылайша өндірісті жолға қойып, киіз шеберханасын ашқан.
ДӘМЕЛІ ЕРМЕКОВА, КӘСІПКЕР:
— Бұған дейін барлығын қолмен жасайтынбыз. Қазір бізде қалың материалдарды тігетін арнайы машина бар. Сондай-ақ барлық ою-өрнекті кесіп беретін лазерлік станок алдық. Мысалы, мен ою-өрнектерді өзім кесіп жасай аламын, ал оқушылар оны жасай алмайды. Жаңадан шеберханамызға келіп қосылған әйелдер үшін де станок – көмекші.
Шеберхана жанында дәстүрлі өнер мектебі бес жылдан бері жұмыс істеп келеді. Осы уақыт аралығында мұнда мыңнан астам бала мен ересек адам білім алған. Жақында олар киізбен жұмыс істеуді, ұлттық кесте тігуді және сәндік-қолданбалы өнердің өзге де түрін меңгере бастады.
АЯНА АМАНДЫҚ, ДӘСТҮРЛІ ӨНЕР МЕКТЕБІНІҢ ОҚУШЫСЫ:
— Мен мұнда бір жылдан астам уақыттан бері оқып жүрмін. Осында өз талантымды көрсетіп, қызығушылықтарымды аша алдым және көп нәрсе үйрендім. Шығармашылық қабілетім де артты.
Мамандардың айтуынша, киіз жыл сайын сән индустриясында танымал болып келеді. Бір қызығы, бастапқыда ата-бабамыз бұл материалды шұғыл континенттік климаттың қатал жағдайларына бейімделу үшін пайдаланған. Ал қазіргі дизайнерлер киізді күнделікті киім үлгісіне үйлестіріп, оны жастар арасында да танымал етіп отыр. Сондықтан дәстүрлі өнер мектебі шәкірттерінің көпшілігі болашақта киізден бұйым жасауды жалғастыра алады деп сенеді. Ал кейбірі үшін бұл өмірлік кәсібіне айналуы мүмкін.
———————————————
#Жаңалықтар #жаңалықтар2026 #жаңалықтаржетіншіарна #Жетіншіарна #седьмойканал #7канал
© 2009-, «Жетінші арна». Барлық құқықтар қорғалған.
