Мәжіліс сайлауында жеңіске жеткен партияларға Парламент партасынан мынадай орынтақтар бұйырды. «Amanat-қа» 40 мандат, «Ауылға» 8 орын, «Respublica» мен «Ақжолға» 6 орыннан, «Қазақстан халық партиясына» 5 және ЖСДП-ға 4 мандат бұйырды.
Айта кеткен жөн болар, сайлауға сан мәрте қатысып жүрсе де, «Ауыл» партиясы Мәжіліске алғаш рет келіп отыр. Ал саяси аламанға тұңғыш рет ат қосқан ЖСДП-ның тек жолы болды деуден артық ештеңе айта алмаймыз. Құрылғанына аз мерзім болса да, су жаңа партия «Respublica» қоғамда сүйкімге ие болғандай. Көздерінде от ойнаған, сөздері жалынды жастардың аз шоғыры жайлы орынға жайғасты. Қалай десек те қазақ елінің ең жоғары заң шығарушы органы тәуелсіздік тарихында алғаш рет 6 партия өкілдерінен жасақталып отырғаны ақиқат. Ендеше сегізінші шақырылымның алғашқы сессиясын ашқан Президент Парламенттің жаңа құрамына қандай міндеттер жүктеді?
Президенттің жарлығымен Смайылов премьер-министр болып қайта тағайындалды. Ал сайлаудың ресми қорытындысын тоғыз күн күткен топ апта басталысымен жұмыстарына асығыс кірісті. Алдымен Орталық сайлау комиссиясы сайланған жұртқа депутаттық мандаттарын үлестіріп, кеуделеріне төсбелгілерін тақты. Ертеңіне Президент жаңа сессияның жұмысын ашып, құзыреті мен қызметі күшейген Парламенттің алдына жаңа міндеттер жүктеді. Сосын бірлескен отырыс біте сала төменгі палата өкілдері жасырын дауыс беру арқылы өздерінің жаңа төрағасын сайлап алды. Ол орынға экс-спикер Ерлан Қошанов қайта жайғасты. Іле Мәжіліс депутаттары ант берді. Осылайша қызметтеріне қызу кіріскен депутаттар жазға дейін демдерін алмай, біраз шаруаны дөңгелетіп тастайтынын көрсеткендей болды. Ол қандай шаруа екенін су жаңа депутат, оның үстіне бір мандаттық округтен сайланған белгілі қоғам қайраткері Ермұрат Бапиден сұрайық.
Былтыр Президент сайлауынан кейін ұлықтау рәсімінде Қ.Тоқаев өзінің ең бірінші жарлығын ауылды дамытуға арнап шығарғаны естеріңізде болар. Осы жолы да Президент ауылға қатысты мәселелерді уақыттың тезіне салып шешу керектігін айтты. Себебі ауыл – қазақтың алтын бесігі. Агроөнәркәсіп – экономиканың негізгі күретамыры. Былтырдан бері «Ауыл – ел бесігі» жобасы аясында 1 мыңнан астам ауылда 3700 нысан жаңғыртылған екен. Дені әлеуметтік, инженерлік инфрақұрылым. Бұл жұмыс болашақта да жалғасады. Биыл тағы 1,5 мыңнан астам жобаға бюджеттен 143 миллиард теңге бөлінбек. Әрі Президент шалғайда қалған шекаралас аудандардың ахуалы мен халықтың әлеуметтік тұрмыс-тірлігін түзету мәселесін де жаңа Парламент пен Үкіметтің арқасына зіл-батпан жүк қылып артты.
Жұма, 31 Наурыз 2023, 18:20
© 2009-, «Жетінші арна». Барлық құқықтар қорғалған.
